Xanım azarkeş Sisipasın başına oyun açıb
Dünya tennisinin ən görkəmli simalarından biri Stefanos Sisipas Sinsinnati turnirinin 2-ci mərhələsində amerikalı Ben Şeltonla qarşılaşarkən xanım azarkeşin davranışından şikayətlənib.
"Football-plus.az" xəbər verir ki, 25 yaşlı yunan ulduz topu oyuna daxil edərkən dayanıb və arxasında əyləşən xanımın kortdan uzaqlaşdırılmasını istəyib.
Onun dediyinə görə, azarkeş daim arı vızıltısını imitasiya edib və əsəblərini korlayıb. Sisipas olayla bağlı belə deyib:
“Kimsə məndən arxada arı vızıltısına bənzəyən səs çıxarır. Düz mən topu oyuna daxil etmək istəyərkən vızıldayır. Düşünürsüz ki, bu normal haldı? İndiyə qədər karyeramda belə şey olmayıb. Bilirəm ki, həmin adam rəqibi dəstəkləyir… Daim bzzz bzzz… O xanım… İstəyirəm ki, onu burdan çıxarsınlar. Topu oyuna daxil etmək istəyərkən fikrim ancaq onun yanında qalır. Elə hey vızıldayır”.
Xanım azarkeş araşdırma zamanı arı vızıltısını imitasiya etdiyini boynuna alıb və hərəkətinə görə üzr istəyib. Şeltonu 7:6 (7:3), 7:6 (7:2) hesabıyla məğlub edən Sisipas isə 3-cü dövrədə polşalı Xubert Xurkaçla qarşılaşacaq.
