Tarixi ana şahidlik edirik. Bu gün paytaxtımızda üç avrokubok görüşü var. "Qarabağ" Avropa Liqasında, "Neftçi" və "Sabah" isə Konfrans Liqasında oyuna çıxır.

Bir çoxları bu mənzərə qarşısında təəccübləndi. Çoxu UEFA-nı qınadı. Amma fikrimcə, belə maraqlı oldu. Azərbaycan güclü və qüdrətli dövlətdi. Şükürlər olsun ki, hər üç klubumuzun da özünə məxsus olan stadionu var. Bu futbol bayramında komandalarımızın əsl azarkeşləri bəlli olacaq. Faktiki ölkənin ən güclü üç klubu bu gün Avropada gücünü sınayacaq. Çoxları düşünür ki, "Qarabağ"dan başqa heç birinin rəqibləri qarşısında şansı yoxdu. Mən şəxsən belə düşünmürəm.

Yenə deyirəm, bu klublar ölkənin ən güclüləridi. Həm "Qarabağ"ın, həm "Sabah"ın, həm də "Neftçi"nin yetərincə güclü maddi dayaqları və azarkeş dəstəyi var. Niyə HİK-dən, "Beşiktaş"dan, "Partizan"dan çəkinməliyik ki? Düzdü, İstanbul təmsilçisi başqalarına baxanda güclüdü. Amma "Neftçi"də rəhbər və struktur dəyişikliyi baş verib. "Ağ-qaralar" küllərindən doğulur. Hətta dünyaca məşhur Adrian Mutunu baş məşqçi təyin etdilər. Ondan öncə Türkiyədə ad-san qazanmış Sərgən Yalçına milyonlar xərcləmək istəyirdilər. O da məşqçi olsaydı, "Beşiktaş"dan çəkinəcəkdi? "Sabah"la görüşdə "Partizan"ı üstün hesab edənləri anlamıram. "Bayquşlar" maliyyə cəhətdən "ağ-qaralar"dan daha yaxşı durumdadı. "Tələbələr"in heyətində də yetərincə əla futbolçular var. Qorxmaq nəyə lazımdı?!

"Qarabağ"dan isə çox danışmağa ehtiyac yoxdu. Bəli, HİK üç il öncə "Neftçi" üstələyərək mərhələ adladı. Amma bu "Qarabağ" həmin "ağ-qaralar"dan aşkar üstündü. Qurban Qurbanovun komandasının Avropada böyük təcrübəsi var. Yəni finlandiyalılardan da qorxmağa dəyməz.

Bu gün şəhərimizdə "futbol günü"dü. Ümid edirəm ki, klublarımız rəqiblərinə dərs keçərək bu günü bayrama, şölənə çevirər...

İLKİN SULTANLI