Türkiyə ilə İtaliya AÇ-2032-ni birlikdə keçirmək istəyir!
Deyəsən, Türkiyənin uzun illərdi davam edən nəhəng turnirə evsahibliyi etmək arzusu reallığa çevriləcək.
“Football-plus.az” xəbər verir ki, amma yaxın yox, bir qədər uzaq gələcəkdə. Dünən İtaliyanın ANSA xəbər portalı Türkiyə ilə İtaliyanın birlikdə AÇ-2032-yə evsahibliyi etmək istəməsi barədə xəbər yaydı. Xəbərdə Türkiyə Futbol Federasiyasının prezidenti Mehmet Büyükekşinin italiyalı həmkarı Qabriele Qravina ilə ortaq namizədlik mövzusunda razılıq əldə etdiyi qeyd olundu. Çox keçmədən bu xəbər TFF tərəfindən rəsmən təsdiqləndi. Qurumun saytında yerləşdirilən bəyanatda qeyd olundu ki, iki ölkənin federasiyası arasında AÇ-2032-yə birlikdə evsahibliyi etmək üçün UEFA-ya müraciət ünvanlanması ilə bağlı razılıq əldə olunub. Bəyanatda buna qədər AÇ-2020, AÇ-2012, AÇ-2008 kimi bir neçə ölkənin şərikinə təşkil etdiyi turnirlər xatırladıldı. Eləcə də DÇ-2026-nın da üç fərqli ölkədə - ABŞ, Meksika və Kanadada keçiriləcəyi vurğulanıldı. Bəyanatda həm də qeyd olundu ki, bu cür turnirlər daha böyük futbolsevər kütləsini əhatə edir və daha böyük marağa səbəb olur. Turnirə evsahibliyi edəcək şəhərlər və stadionlar isə iki ölkənin federasiyası tərəfindən daha öncə UEFA-ya bildirilən şəhər və stadionlar arasından seçiləcək. TFF başqanı Mehmet Büyükekşi də məsələ ilə bağlı açıqlama verərək bunları deyib:
“Bu gün həm Türkiyə, həm də Avropa futbolu adına önəmli bir qərara imza atdıq. İtaliya Futbol Federasiyası ilə olan işbirliyimiz Avropa futbolunun içində yer alan dostluq dəyərlərinin yüksək olduğunu göstərir. Bu işbirliyinin yüzilliklərdi davam edən bənzər mədəniyyət və köklü tarixin parçası olan, Aralıq dənizinin sahilində yerləşən iki ölkə arasında münasibətləri, əlaqələri gücləndirəcəyinə, futbolumuzun gələcəyi üçün körpü rolunu oynayacağına inanıram. Başqa rəqibimiz yoxdu. Ona görə də inşallah istəyimizə çatacağıq”.
Daha sonra UEFA-dan da bununla bağlı rəsmi açıqlama gəldi. Hər iki federasiya prezidenti oktyabrın 10-da Nyonda AÇ-2032 ilə bağlı layihələrini UEFA-nın idarə heyətinə təqdim edəcək.
Əslində Türkiyə ilə İtaliyanın bu məsələdə birləşmək istəyi haqda şayiələr hələ iyulun ortalarında peyda olmuşdu. Həmin vaxt iddia edilmişdi ki, hər iki ölkədən 6 stadion seçiləcək. Açılış oyunu İstanbuldakı “Atatürk Olimpiya”, final isə Romadakı “Olimpiya” stadionunda keçiriləcək. Amma bu məqamlara yalnız rəsmi açıqlamalardan sonra aydınlıq gələcək.
Qeyd edək ki, əla infrastruktura və müasir stadionlara güvənən TFF əvvəlcə həm AÇ-2028, həm də AÇ-2032 üçün ayrılıqda namizədliyini irəli sürmüşdü. AÇ-2028 üçün türklərdən başqa Böyük Britaniya ilə İrlandiya da şərik olaraq namizədliyini açıqlamışdı. AÇ-2032 üçün isə Türkiyənin yeganə rəqibi İtaliya idi. UEFA Türkiyə ilə İtaliyanın şərikli namizədliyi qəbul etsə, bu məsələdə faktiki uduzan qalmayacaq. Yəni belədə AÇ-2028 Böyük Britaniya ilə İrlandiyaya, AÇ-2032 isə Türkiyə ilə İtaliyaya qismət olacaq.
Digər xəbərlər
