Hələ iyunun 7-də “İnter Mayami”yə keçidi elan olunan Lionel Messinin çoxdan gözlənilən təqdimat mərasimi, nəhayət, baş tutdu.

"Football-plus.az" xəbər verir ki, iyulun 16-dan 17-nə keçən gecə, yerli vaxtla saat 01.30-da Floridada başlamalı olan mərasim hava şəraiti üzündən 30 dəqiqə yubandı. Xatırladaq ki, Messinin Amerika klubu ilə müqaviləsinin müddəti 2025-ci il dekabrın 31-nə qədər nəzərdə tutulub. Argentinalının ildə 60 milyon dollar alacağı bildirilir.

36 yaşlı ulduzun təqdimat mərasimində stadion, demək olar ki, ağzınacan dolu idi. Mərasimə klubun həmsahibi Devid Bekhemlə baş məşqçi Xerardo Martino da qatılmışdı. Leo “İnter Mayami”yə keçidini belə şərh etdi: “Burda olduğuma görə çox xoşbəxtəm. Məşqlərin və oyunların başlayacağı an üçün səbirsizlənirəm. Ona görə burdayam ki, həmişə olduğu kimi komandaya qələbə qazanmaqda yardım edim. Bu işdən böyük məmnunluq duyuram”.
Yeri gəlmişkən, Messinin “Barselona”dakı komanda yoldaşı Serxio Buskets də “İnter Mayami” azarkeşlərinə təqdim olunub. Klubun mətbuat xidmətinin yaydığı xəbərə görə, yarımmüdafiəçi ilə müqavilənin müddəti də 2025-ci ilə qədərdi. O, MLS klubuna azad agent kimi keçib.

Yeni klubunda 5 nömrəli forma ilə çıxış edəcək 35 yaşlı ispaniyalı 2005-ci ildən “Barselona” sistemində olub, bu komandanın heyətində keçirdiyi 722 oyunda 18 qol vurub, 45 məhsuldar ötürmə verib. Təcrübəli yarımmüdafiəçi Kataloniya klubu ilə 9 dəfə İspaniya çempionu, 7 dəfə ölkə kubokunun və Superkubokunun, 3 dəfə Çempionlar Liqasının, eləcə də UEFA Superkubokunun qalibi olub. Buskets də “İnter Mayami”yə keçidi ilə bağlı danışıb: “Xüsusi və cəlbedici imkandı. Bu imkandan yararlanmaq fikrindəyəm. Karyeramın “İnter Mayami” ilə bağlı olacaq növbəti mərhələsini səbirsizliklə gözləyirəm. Ötən il “Barselona” ilə Amerikaya gələndə bu klub mənə möhtəşəm təsir bağışlamışdı. İndi isə özüm də “İnter Mayami”ni təmsil edəcəyəm deyə çox xoşbəxtəm. Bu ambisiyalı kluba hədəflərinə çatmaqda yardımçı olmaq istəyirəm”.

Bu arada “İnter Mayami”nin çalışdırıcısı Xerardo Martino Messiyə münasibətdə dözüm göstərməklə bağlı çağırış edib: “Ondan başlayaq ki, Messi ilə rəsmi müqavilə imzalanmasına görə çox şadıq. Təqdimat mərasimi ilə bağlı ona hədiyyə etmək istəyirdik, ancaq buna nail ola bilmədik (“İnter Mayami” çempionatın son turunda “Sent-Luis Siti”yə 0:3 hesabıyla uduzub – red.). Gələcəyə dünyanın ən yaxşı oyunçusunun komandamızdakı varlığından doğan həyəcanla baxırıq. Ancaq həm ona münasibətdə təmkin, dözüm göstərməli, həm də fiziki cəhətdən tam hazır olması üçün imkan yaratmalıyıq ki, lazımi məqamda oynaya bilsin”.

Messinin həmvətəni Serxio Aquero da bu keçidlə bağlı danışıb: “Gerçəklik budu ki, Leonun burda – Mayamidə olmasına görə çox sevinirəm. Mən burda yaşayıram, bu məqamdan ləzzət almağa çalışacağıq. Çoxları onun oyununu televizorda görməkdən məmnunluq duyub, indi isə Leonu canlı görəcəklər. Biz danışarkən bir dost kimi, adətən, ondan hara keçdiyini soruşmamağa çalışıram. Bəzən ondan soruşurdum ki, nə etmək fikrindəsən, cavabı belə olurdu: “Məni baerbeküdə gözlə, mənim üçün hər şey hazırla, çünki ora gəlirəm”. Deyirdim ki, burda onu görməyə şad olarlar. Açığı, Messinin bura gəlməsini istəyirdim, çünki özüm də burda yaşayıram. Həmişə sakit, dostcasına danışmağa çalışırıq. Aydındı ki, Leo MLS-i dəyişəcək. Başqa oyunçular da ona görə bura gəlmək üzərində düşünəcəklər. Leo MLS üçün münasib oyunçudu, başqa futbolçuların da bura gəlmək üçün motivasiyası olacaq. MLS-in böyüməsini davam etdirməyə çalışacağıq”.