Dünən Çempionlar Liqasının 1-ci təsnfat mərhələsinin cavab qarşılaşmalarına yekun vuruldu. BOS-da "Linkoln"u qəbul edən "Qarabağ" rəqibini darmadağın etməklə (4:0) növbəti mərhələyə yüksəldi. Təmsilçimiz 2-ci mərhələdə Polşa çempionu "Rakuv"la münasibətləri aydınlaşdıracaq.

"Football-plus.az" saytı olaraq rəqiblə bağlı dolğun informasiya almaq üçün Polşa çempionatını yaxından izləyən Erkin İbrahimovla əlaqə saxladıq. Tanınmış meneceri dinləyək:

"Rakuv" elə də böyük ənənəsi olmayan klubdu. Lakin çox döyüşkən komandadı. 3-lü müdafiə ilə oynayırlar. Qapıçıları isə serbiyalıdı. Qısası, arxa xətt oyunçuları yetərincə güclüdü. Onların müdafiə xəttini yarmaq və qapıçısını məyus etmək çətindi. Normalda müdafiədə güclü olan klublara maksimum erkən qol vurmaq lazımdı ki, irəli atılsınlar.

"Rakuv"da baş məşqçi dəyişikliyi olsa da, heyəti demək olar qorudular. Əlavə olaraq da "Ferentsvaroş"dan Kovaçeviç, "Vrostlav"dan isə Yeboanı transfer etdilər. Hər 2 futbolçunu yaxından tanıyıram, ünsiyyətim var. Keyfiyyətli və oyunun taleyini həll edən fiqurlardı. Ağdam təmsilçisi onlara ciddi diqqət ayırsa, yaxşı olar. Amma ümumilikdə "Qarabağ"ın avrokubok təcrübəsi daha çoxdu. Məhz bunun sayəsində Polşa təmsilçisinə qalib gələ bilərik".

ABDULLA İSMAYILOĞLU