Türkiyə Futbol Federasiyası (TFF) Hakimlər Komitəsinin (HK) yeni tərkibini açıqlayıb.

"Football-plus.az" xəbər verir ki, Türkiyə mətbuatında artıq neçə müddət idi komitənin sədrinin dəyişəcəyi ilə bağlı xəbərlər səngimək bilmirdi. Çünki yanvarın sonlarından etibarən bu vəzifəyə gətirilən və komitənin tarixində ilk qadın başqan olan Lalə Ortanın dönəmində vəziyyət heç də yaxşıya doğru dəyişməmişdi. Şayiələr təsdiqini tapıb. Belə ki, HK-nın sədri vəzifəsinə Ahmet İbanoğlu gətirilib.

Komitənin yeni üzvləri isə bunlardı: Ünsal Çimən, Tolqa Özkalfa, Ahmet Ərdoğan, Ərhan Sönməz, Seçim Dəmirəl, Səfər Altuntaş, İbrahim Çınar, Ziya Çətin.

Qeyd edək ki, Ahmet İbanoğlu 1981-98-ci illərdə 5 ili superliqada olmaqla ümumilikdə 17 il Türkiyənin peşəkar liqalarında hakim kimi çalışıb. Elə peşəkar karyerasını başa vurandan sonra da uzun illər federasiyada müxtəlif vəzifələrdə işləyib. Maraqlıdı ki, İbanoğlu son 8 ildə HK-nın 8-ci fərqli prezidentidi! 2015-dən bəri bu vəzifəni uyğun olaraq Kuddusi Müftüoğlu, Yusuf Namoğlu, Zəkəriyyə Alp, Sərdar Tatlı, Fərhat Gündoğdu, Səbri Çelik və sonuncu dəfə Lalə Orta icra edib.

Yeri gəlmişkən, TFF-nin daha bir önəmli qərarını sizə çatdıraq. Bilindiyi kimi, “Fənərbaxça” 1959-cu ildən, yəni Türkiyə çempionatının rəsmi başlanğıc tarixindən əvvəlki illərdəki çempionluqların nəzərə alınması üçün 2 ildən artıqdı federasiyaya baş vurub. Qurum, nəhayət, bu mövzuda belə desək, ölü nöqtədən tərpənmək qərarına gəldi. Belə ki, TFF bu məsələnin araşdırılması üçün xüsusi bir komissiya yaradıb! Komissiyanın tərkibi açıqlanmasa da, ora ölkənin sayılıb-seçilən professorları və tarixçiləri cəlb olunub. Federasiyanın bu qərarı “Qalatasaray” cəbhəsində böyük narazılıqla qarşılanıb.

Başqan Dursun Özbək TFF-nin bu addımını sərt şəkildə tənqid edib. Xatırladaq ki, hazırda 19 çempionluğu olan “Fənər” 1959-dan öncə də Milli Liqa adı altında bütün ölkəni əhatə edən turnir keçirildiyini və orda 9 dəfə çempion olduğunu iddia edir. Yəni “Fənər”in tələbi həyata keçsə, komandanın çempionluq sayı 28-ə çatacaq. Hazırda 23 çempionluğu olan “Qalatasaray”ın isə 1959-dan əvvəlki dönəmdə yalnız bir çempionluğu olub.