Ötən mövsümün sonlarında "Sumqayıt-2"də baş məşqçi dəyişikliyi gerçəkləşdi.

Vaqif Cavadov "kimyaçılar"ın əvəzedicilərinin “sükanı arxasına” keçdi. Millinin sabiq üzvünün təyinatından sonra komanda sonuncu pillədən qurtuldu. Veteran futbolçu ilə yeni “futbol ili”ndə komandasıyla bağlı planları və başqa mövzularla bağlı söhbət etdik.

- Birinci divizionun sonlarına yaxın "Sumqayıt-2"yə baş məşqçi təyin olundun. Ümumilikdə komandanın çıxışını necə qiymətləndirərdin?
- Çempionatın başa çatmasına 5 tur qalmış baş məşqçi təyin olundum. Klub çətin vəziyyətdə idi. 5 oyundan 3-də qalib gələrək sonuncu pillədən qurtulduq. Ən azı turnir cədvəlinin dibində qalmamaq üçün döyüşdük. Ümumilikdə uşaqların çıxışından razı qaldım.

- Yeni mövsümdən əvəzedicilərin çempionatı ayrı keçiriləcək. "Sumqayıt-2"nin hədəfi nə olacaq?
- Əsas məqsəd istedadlı gəncləri üzə çıxarmaqdı. Əsas komandaya futbolçular yetişdirmək istəyirəm. Bununla yanaşı, nəticə də vacibdi. Komanda nə qədər yaxşı çıxış edursə, futbolçularda özünəinam, oyuna motivasiya və iddia artır. Çalışacağıq əvəzedicilərin çempionatında yaxşı çıxışla da diqqəti çəkək və maksimum irəli gedək.

- Seleksiya işləriniz Sumqayıt və ətrafı ilə məhdudlaşacaq, yoxda bölgələrdə də bacarıqlı uşaqlar axtarılacaq?
- Təbii ki, axtarışlarımız ancaq Sumqayıtla yekunlaşmayacaq. Amma əsasən akademiyanın uşaqları arasında seleksiya aparacağıq. Çünki U-19 komandamızda yetərincə potensiallı gənclər var. Onların üzərində bir qədər də işləyib əsas komandaya qazandırmaq istəyirik.

- Əvəzedicilərə gələndən sonra əsas komandaya neçə futbolçu qazandırmısız?
- 9 yetirməmiz hazırda əsas komandadadı.

- Bəs əsas komandadan yeni mövsümdə nə gözləyirsiz? "Kimyaçılar" bu il uğur qazana biləcək?
- Hələ toplanış davam edir. Komanda hazırlıq prosesinin 1-ci mərhələsini Sumqayıtda, ikincini isə Türkiyədə keçirəcək. Yeni transferlərdən, heyətin komplektləşməsindən çox şey asılı olacaq. Çempionatın startına da hələ var. İnanıram ki, bu il daha kreativ futbol sərgiləyən və iddialı "Sumqayıt" görəcəyik.

- Sabiq komandan "Qarabağ" ÇL-in 1-ci mərhələsində Cəbəllütariq səfərində çətin qələbə qazandı. Bu barədə nə deyə bilərsən?
- Ağdam təmsilçisinin çətin qələbə qazandığını deməzdim. "Linkoln"la "köhlən atlar" arasında səviyyə fərqi göz önündədi. Sadəcə, havanın hədsiz isti, rəqibin stadionunun qazonunun süni olması və başqa səbəbləri nəzərə almaq lazımdı. Sadalananlar "Qarabağ" üçün müəyyən əngəllər yaratdı. Amma komanda sona qədər döyüşərək rəqibi təzyiq altında saxlaya bildi. Hətta 2-ci yarıda, demək olar, rəqibin rahat oynamasına və müdafiədən çıxmasına imkan vermədi. Əminəm ki, cavab görüşündə təmsilçimiz aşkar favorit olaraq böyükhesablı qələbə qazanacaq. Qurban müəllimə və yetirmələrinə uğurlar arzulayıram.

ABDULLA İSMAYILOĞLU