Çempionlar Liqasında yeni macəraya başlayan "Qarabağ"ın turnirə tam hazır olmaması Cəbəllütariq təmsilçisi “Linkoln”la səfər oyununda aşkar göründü.

Komandanın bütün mövqelər üzrə güclənməsi vacibdi. Amma iki mövqeyə xüsusi həssaslıqla yanaşılmalıdı: müdafiənin mərkəzi və hücum xətti. Ağdam klubunun arxa xəttində Medina ilə Bəhlulun dueti hələ ki effekt vermir. İlk oyunda kolumbiyalının kobud səhvi və rəqib futbolçu Qomesin bundan istifadə edərək hesabı açması da Qurban Qurbanov üçün həyəcan təbili olmalıdı. İlk mərhələni keçdikdən sonra heyətə mütləq mərkəz müdafiəçisi cəlb olunmalıdı. "Köhlən atlar"ın hücum xətti də kreativ görünmədi. Nəriman Axundzadənin start heyətində yer alaraq ÇL-də oynaması futbolumuz üçün nə qədər təqdirəlayiq hal olsa da, gənc oyunçu hələ Musa Qurbanlı səviyyəsində deyil. Baxmayaraq ki, "90 nömrə" fiziki göstəricilərinə və perspektivinə görə Musadan üstündü. Həqiqət naminə etiraf etmək lazımdı ki, 19 yaşlı forvard "Linkoln"la oyunda rəqib qapısına yol tapmaq üçün çox çalışdı. Hətta bir zərbəsi tirdən qayıtdı. Onun təcrübəsizliyi kənardan aydın görünürdü. Bunun da əsas səbəbi Qurban hocanın gənc oyunçuya yetərincə şans tanımamasıdı. Nəriman yola saldığımız mövsümdə cəmi 9 oyunda şans qazanmaqla 242 dəqiqə meydanda olub. Bu göstərci, təbii ki, perspektivli gənc üçün heç nədi. Hələ ötən mövsümün qış fasiləsində forvardın icarə əsasında "Şamaxı"da oynamaq şansı yaranmışdı. Lakin Qurban Qurbanov həmin qapını gənc futbolçunun üzünə bağlayaraq "Nərimanın perspektivi var, amma üzərində hələ çox işləməlidi. Parlaması və futbolumuza qazandırmaq üçün qarşıdakı oyunlarda şans verəcəyik" demişdi. Sonradan baş məşqçi "90 nömrə"nin ulduzunun parlamasında maraqlı olmadı. Halbuki o bölgə təmsilçisinə keçsəydi, çempionatın ikinci yarısında "şirlər"in heyətində həm yetərincə oyun təcrübəsi qazanacaq, həm qollar vuracaq, həm də bu gün "Qarabağ"a daha yaxşı səviyyədə qoşulub fayda verəcəkdi. Dediklərimə bariz nümunə kimi Rəhman Daşdəmirov, Fuad Bayramov, Rauf Hüseynli, Kamran Quliyev və Nihad Quliyevi göstərə bilərəm. Adı çəkilənlərin hər biri yola saldığımız “futbol ili”ndə "Şamaxı"da öz üzərində maksimum çalışmaqla, əsas heyət oyunçularına çevrilməklə yanaşı, mövsümün sonunda daha güclü komandaların diqqətini çəkdilər. Bunun nəticəsidi ki, Rəhman "Sabah"a, Fuad "Zirə"yə, Rauf "Qəbələ"yə, Kamran "Kəpəz"ə keçdi, Nihad isə "köhlən atlar"a qayıtdı. Deməli, ölkənin 1 nömrəli klubunda ehtiyatda qalıb inkişaf baxımından “pəhriz”də olmaqdansa, autsayderun heyətində müntəzəm çıxış etməklə tərəqqiyə doğru addımlamaq mümkündü.

ABDULLA İSMAYILOĞLU