"Qarabağ" toplanışı yenicə başa vurub. İlk oyun idi. Stadionun örtüyünün yaxşı vəziyyətdə olmaması, isti havanı və futbolçuları psixoloji durumunu nəzərə alsaq, çətin qarşılaşma alındı. Ümumilikdə "köhlən atlar" yaxşı oynadı.

Komandaya yeni qoşulanlar var, hələ tam uyğunlaşa bilməyiblər. Amma inanıram ki, zamanla daha yaxşı çıxış edəcəklər. Qurban müəllim yetərincə savadlı mütəxəssisdi, hər şeyin yaxşısını bilir. Lakin kənardan oyuna baxan kimi müdafiənin mərkəzindəki çatışmazlıq nəzərimdən qaçmadı. Maksimlə Qaranın yeri göründü. Toralın şans qazanmamasına da təəccübləndim. Əsas odu ki, doğma klubumuz qələbə qazandı. Bakıda da qazanacağımızdan əminəm. Yeganə narazı qaldığım məqam cavab görüşünün BOS-a salınmasıdı. Adı çəkilən stadion mənə görə futbol matçları üçün əlverişli deyil. Ora dövlət tədbirləri, konsert, qurultay, Olimpiada üçün daha uyğundu. Futbol görüşləri üçün tarixi ənənəsi olan Tofiq Bəhramov kimi stadionumuz var. Adı çəkilən məkan neçə-neçə tarixi oyuna evsahibliyi edib. Orda çoxsaylı oyunların enerjisi var. Həmçinin futbolçuları daha yaxından izləyə bilirsən. Məndən olsa, bütün avrokubok təmsilçilərimizin ev oyunlarını “Tofiq Bəhramov”da keçirməsini istəyərəm".

"Ümummilikdə müşahidə etdiyimiz və Qurban Qurbanovun da tez-tez qeyd etdiyi kimi, ilk oyunlar çox çətin alınır. Yəni "Qarabağ" 1-ci mərhələni ağır keçir. Bu səfər matçı da ağır alındı. Cəbəllütariq klubunu yaxşı təhlil edə bilməmək, onların sıx müdafiə olunması, vaxt uzatması, havanın isti keçməsi, qazonun süniliyi də sözünü dedi. Rəqib həvəskar oyunçulardan təşkil olunsa da, "Qarabağ"a ilk yarıda yaxşıca başağrı oldu. Yuxarıda sadaladıqlarıma əsasən təmsilçimiz sürətli, dinamik futbol sərgiləyə bilmədi. Medina ilə Şahruddin səhvlərlə diqqəti çəkdi. Bəhlul - Medina cütlüyü bir-birini “sığortalamaqda” hələ ki çətinlik çəkir. Buna rəğmən, "köhlən atlar" fasilədən sonra daha yaxşı təsir bağışlayaraq qələbə qazana bildi. Rəqibə sona qədər döyüşməsinə görə alqış düşür. Lakin Bakıda Ağdam təmsilçisi onları top atəşinə tutacaq. Artıq onların bütün zəif tərəfləri bəllidi. Qurban Qurbanovun yetirmələrinin ən azı 3 qol vurmaqla qalib gələcəyi qənaətindəyəm. “Cırtdanlar” Bakıda ən yaxşı halda bir hissə tab gətirəcək. Erkən qol vursaq, davamı gələcək. İlk oyunda Zubirin oyunu heç də yaxşı alınmadı, baxmayaraq ki, 1-ci qolun ötürməsini verdi. Bakıda daha sürətli, təhlükəli olacaq”.

"Qarabağ" həmişə ilk oyunlarda çətinlik çəkir. Cəbəllütariq səfəri də Ağdam təmsilçisi üçün ağır keçdi. Amma əsas odu ki, komanda toparlana, qələbə qazana bildi. Qarşıdakı oyunlarda oturuşmuş heyət formalaşdıraraq daha yaxşı çıxış edib sabitliyi qoruyacaq. Cavab görüşünün çətin olmayacağını düşünürəm".

"Qarabağ" avrokuboklarda ilk mərhələni həmişə çətinliklə keçib. "Linkoln" Konfrans Liqasının qrupunda oynasa da, Ağdam təmsilçisinin ÇL-dəkı rəqibləri sırasında ən zəifidi. Cəbəllütariq təmsilçisi əsasən həvəskarlardan təşkil olunub. "Qarabağ"ın ilk görüşdə tam gücünü ortaya qoymadığını düşünürəm. Səfər oyunu təmsilçimizə təhlükəli siqnallar verdi. "Köhlən atlar"ın heyətində ciddi itkilərin olduğunu düşünürəm. Musa Qurbanlı gedəndən sonra hücumçu problemi yaranıb. Ona görə baş məşqçi dünən gənc Nərimana ilk dəqiqələrdən şans verdi. Orta sahədə və müdafiədə də çatışmazlıqlar göründü. Komandaya ciddi transferlər lazımdı. Təmsilçimiz ÇL-in qrupuna düşməyi hədəfləyirsə, mütləq güclənməlidi".