“Qarabağ” iyulun 19-da Çempionlar Liqası çərçivəsində “Linkoln”la cavab görüşünə çıxacaq. Çempion səfərdən qələbə ilə dönməklə, demək olar ki, cavab görüşünü formallığa çevirib. Çərşənbə günü Bakı Olimpiya Stadionunda möcüzə baş verməsə, ağdamlılar növbəti mərhələyə adlayacaq, daha dəqiqi, ÇL-in qrupuna düşmək uğrunda mübarizəni davam etdirəcək.

Səfərdən qələbə ilə qayıtdığını nəzərə alsaq, məntiqlə “Qarabağ” 68 minlik stadionda tək-tənha görünməməli, lazımi azarkeş dəstəyi ilə əhatə olunmalıdı. Amma olunacaqmı, stadiona çox demirəm, heç olmasa, 25 min azarkeş gələcəkmi? Bax, bu məqam günlərdi məni düşündürür və qəlbimin dərinliklərində heç cür ümidverici cavab tapa bilmirəm.

Zahirən stadionlar cansız varlıqdı da – daş, qum, sement, yəni beton qarışığı, plastik oturacaqlar, metal konstruksiyalar və s. və i.a. Ancaq istənilən stadion həm də hansısa bionerjinin daşıyıcısıdı. "Futbol+"ə açıqlama verən Aqil Abbas cavab görüşünün BOS-a salınmasından narazılığını bildirərkən “Tofiq Bəhramov”a işarə ilə “orda çoxsaylı oyunların enerjisi var” deyib. Amma təkcə oyunlarınmı? Yox, Aqil bəy, indiyə qədər o stadiona yolu düşən, həyatının ən gözəl anları ora ilə bağlı olan milyonlarla azərbaycanlının da enerjisi var. Biz həyat enerjimizi illərlə əyləşdiyimiz oturacaqlara keçirmişik, bizdən sonra həmin oturacaqlarda əyləşənlər də o enerji ilə yükləniblər, beləcə nəsildən-nəslə keçən enerji, bionerji zənciri yaranıb. Yadımdadı, əvvəllər oturacaqlar taxtadan idi, onların üzərində əyləşib futbola baxmağın, atdanıb-düşməyin də bir ayrı ləzzəti var idi. Mən ölüm, məhz o tribunalarda qol sevinci altında heç tanımadığımız adamlarla qucaqlaşmamışıqmı, sarmaş-dolaş olmamışıqmı? Sizi bilmirəm, şəxsən mən olmuşam və bunu da emosiyaların nəzarətdən çıxması kimi dəyərləndirib sakitcə üzərindən keçmişəm.

“Qarabağ”ı “Bəhramov”dan BOS-a aparmaq həm də o bioenerjidən məhrum etmək deməkdi. Faktiki çempion ən tarixi qələbələrinin qeydə alındığı stadiondan çox nəhəng, amma futbola baxmaq üçün qətiyyən əlverişli olmayan, futbolçunun azarkeş dəstəyini duymadığı, azarkeşin və jurnalistin meydanda yaşananları diqqətlə izləyə bilmədiyi idman qurğusuna “sürgün olunur”. Heç bilmirəm bu fikri mənə qədər də səsləndirən olubmu, olubsa da belə, günahımdam keçsin, necə deyərlər, təkrar biliyin anasıdı: BOS-a bilet alan hər kəsə üzərində binokl da hədiyyə olunmalıdı ki, meydanda yaşananları görə bilsin, əslində orda keçirilən oyunlara televizorda baxmaq daha yaxşı effekt verir, nəinki canlı baxmaq. Hörmətli millət vəkili ilə başdan-sona qədər razıyam: ora dövlət tədbirləri konsert, qurultay, Olimpiada üçün uyğundu, nəinki “Qarabağ”ın cavab görüşü üçün!

BOS-un bütün tribunaları dolarsa, anşlaq yaşanarsa, bəlkə də yaşıl meydana çıxan futbolçu hansısa dəstək effekti, ətrafda onu irəli, qələbəyə səsləyən güc olduğunu hiss edər. “Linkoln”la cavab görüşü üçün 68 min demirəm, 28 min azarkeş uman klub, adam hədsiz dərəcədə nikbin birisi olmalıdı. Ağdam klubu oyunu bu stadionda keçirməyə razılıq verməklə özünü bioenerjidən də, azarkeş dəstəyindən də məhrum edib. Mənim üçün çox maraqlı olan məqamlar var. İlk növbədə onu düşünürəm ki, rəqib “Linkoln”dusa, lap elə Suraxanı stadionu ilə də kifayətlənmək olardı. “Qarabağ”ın ev oyunlarını keçirdiyi stadiondan da bərbad stadionlarda avrokubok oyunlarını dəfələrlə izləmişik. Odu ki, bu mənada problemlə üzləşə biləcəyimizi düşünmürəm. İkinci variant isə “Bakcell Arena”dı ki, bu variantın heç müzakirə olunmamasının səbəbini anlamıram.

Doğrudanmı səbəb həmin stadionun “Qarabağ”ın əsas və əzəli rəqibinə məxsus olmasından ibarətdi? Kimsə məni belə gülünc dəlilə inanmağa səsləməsin, çünki inanmayacam. Avrokubok oyunları ölkəmizdə əzəli-əbədi rəqibləri də vahid çətir altında birləşdirir, belə oyunlarda “Qarabağ” azarkeşinin “Neftçi”yə, “Neftçi” azarkeşinin də “Qarabağ”a dəstək verməsi tam mümkün variantdı. Hərçənd indiki məqamda heç kiminsə kiməsə dəstək verməsindən də söhbət getmir. Sadəcə, “Qarabağ” bu oyun üçün “Neftçi”nin stadionunun xidmətindən yararlana bilərdi və buna görə kimsə Ağdam klubunu qınamazdı.

Amma indi hansı durumla üz-üzəyik? Sirr deyil ki, “Qarabağ” “Linkoln”a qarşı az qala boş tribunalar önündə oynayacaq. Lap bionerjini-filanı da bir kənara qoyaq, teleeffekt də bərbad olacaq, futbolçu irəli atılmağa motivasiya tapa bilməyəcək, hər kəs və hamımız “Bəhramov”da görməyə öyrəşdiyimiz ÇL ab-havası üçün darıxacağıq. Dəyərdimi?

HUŞƏNG