“Millinin U-21-lə yoxlama oyununu şəhərdə olmadığıma görə izləyə bilmədim. Ancaq bu o demək deyil ki, matçla bağlı məlumatım yoxdu. Məşqçilər Komitəsinin üzvü kimi bizim, demək olar, çox şeydən xəbərimiz var.

Belə qarşılaşmalarda hesab önəm daşımır. Əsas komandanın funksional və fiziki hazırlığıdı. Bildiyiniz kimi, bizdə çempionat ötən ayın sonunda başa çatıb. İyunun 3-də keçirilən ölkə kubokunun finalı ilə mövsümə yekun vurulub. Həlledici qarşılaşmada üz-üzə gələn “Qəbələ” və “Neftçi”dən yığmaya o qədər də çox futbolçu çağrılmayıb.

Həmişəki kimi əsas yük “Qarabağ”ın futbolçularının üzərinə düşəcək ki, onlar da xeyli vaxtdı oyun təcrübəsindən məhrum olub. Bu məqam məni bir qədər narahat edir. Bu yerdə məşqçi işi özünü göstərməlidi. Çempionatın gedişində millinin oyunu keçiriləndə baş məşqçinin komandanı hazırlamağa o qədər də vaxtı olmur. Futbolçular klublardan gəldiyi üçün hazır olurlar. Estoniya ilə qarşılaşmada komandanın fiziki cəhətdən hansı durumda olması həlledici rol oynayacaq.

Canni de Byazi elə etməlidi ki, komanda hər iki hissədə eyni templə oynasın, ikili mübarizələrdə rəqibə uduzmasın. Bu dəfə ən böyük məsuliyyət məhz baş məşqçinin üzərində olacaq”.

“Estoniyaya asan rəqib kimi baxmaq olmaz. Heyətinə diqqət yetirəndə görürük ki, əksər futbolçuları Avropada çıxış edir. Zəif oyunçu legioner həyatı yaşamaz. Onlar da Bakıya xal üçün gələcəklər. Bizim legionerlərə gəlincə, millinin hazırda üç oyunçusu ölkə xaricində çıxış edir. Mahir Emreli, Renat Dadaşov, Anton Krivotsyuk millinin lideri kimi komandanı arxasınca aparmalı, meydanda ən yaxşılardan olmalıdı. Bir də ən vacibi komanda üzvləri bir-birinə, məşqçilər korpusuna inanmalıdı. Kollektiv başqa, komanda başqa. Estoniya ilə görüşdə məhz komanda olmağı bacarmalıyıq”.

“Əvvəlki iki matçda böyük hesabla məğlub olmuşuq. Deyək ki, həm Avstriya, həm də İsveç qrupun favoriti kimi göstərilir. Amma Estoniya ilə, demək olar, eyni səviyyədəyik. İnanıram ki, şənbə günü keçiriləcək qarşılaşmanın sonunda sevinən tərəf biz olacağıq. Qələbədən başqa yolumuz yoxdu”.