Yola saldığımız mövsümdə kasad heyətinə rəğmən, kreativ, şən futbol sərgiləyən komandalardan biri də "Qəbələ" idi. Bölgə təmsilçisi avrokuboklara vəsiqə uğrunda iki “cəbhə”də sona qədər döyüşərək həm 4-cü yeri tutdu, həm də ölkə kubokunun qalibi oldu. "Qırmızı-qaralar"ın heyətində parlayan futbolçulardan biri də Emil Səfərovdu. Bunun nəticəsidi ki, Canni de Byazi 20 yaşlı yarlmmüdafiəçini milliyə dəvət etdi.

"Football-plus.az" olaraq bütün bunları nəzərə alıb, dünən onunla danışmağı lazım bildik.

- Mövsümü komandan və özün üçün necə qiymətləndirərsən?
- Məncə, bu mövsüm çox maraqlı və həddən artıq rəqabətli keçdi. Həm "Qəbələ", həm də özüm üçün gözəl mövsüm alındı.

- Premyer-liqada 4-cü, ölkə kubokunda qalibi olacağınızı gözləyirdin?
- Mövsümə başlayanda qarşımıza məqsəd qoymuşduq ki avrokuboklara getməliyik. Ona görə də hər iki “cəbhə”də maksimum xarakter göstərib gücümüzü qoyduq. Şükürlər olsun ki, istəyimizə nail olduq.

- Çoxları səni mövsümün tapıntılarından sayır. Bununla bağlı nə deyə bilərsən?
- Haqqımda xoş sözlərin deyilməsi sevindirici haldı. Amma hələ üzərimdə çox işləməliyəm. İnşallah, çalışacam ki, daha da yaxşı olum.

- "Qəbələ" ilə müqaviləni yenilədin. Başqa təkliflər yox idi?
- Təkliflər var idi, amma "Qəbələ"də qalmağı seçdim. Düşünürəm ki, bununla ən düzgün olanı etdim.

- İlk dəfə yığmaya dəvət aldın...
- Hər bir futbolçunun arzusu olduğu kimi, mənim də arzum milli komandaya dəvət almaq idi. Buna görə çox şadam. Çalışacam əlimdən gələnin yaxşısını edim ki, yığmaya faydalı olum.

- Milli seçmə mərhələyə uğursuz başladı. Necə düşünürsən, növbəti görüşdə Estoniyanı üstələyə biləcəyik?
- Futbolda hər cür nəticə qeydə alınır. Bəzən ən güclü yığmalar da yaşıl meydanda uğursuzluğa məruz qalır. Odu ki, hər şey ola bilər. İlk dəfə ölkənin əsas komandasına dəvət almışam. Qismət olsa, debüt oyunumda özümü yaxşı tərəfdən göstərəcəm. İnanıram ki, hamılıqla yığmamız üçün əlimizdən gələnin ən yaxşısını edəcəyik. İnşallah, Estoniya ilə qarşılaşmada sevinən tərəf olarıq.

- "Qəbələ"ni də Konfrans Liqasında mübarizə gözləyir. Heç olmasa, iki mərhələ keçə biləcəksiz?
- Ölkə çempionatında və kubokdakı uğurlu çıxışımızı Konfrans Liqasında da davam etdirmək istəyirik. Məqsədimiz maksimum irəli getməkdi. Fikrimcə, iki mərhələ keçsək, bizim üçün çox yaxşı olar. Bunun üçün əlimizdən gələnin ən yaxşısını edəcəyik.

ABDULLA İSMAYILOĞLU