“Yuventus”un maliyyə saxtakarlığına görə İtaliya çempionatında 10 xaldan məhrum edilməsi bir sıra transfer məlumatları ilə müşayiət olunub.

"Football-plus.az" xəbər verir ki, artıq iki dünya çempionunun komandanı tərk edəcəyi məlumdu.

Anxel Di Mariya mövsümün sonunda komandadan ayrılacaq. “Football Italia” nəşrinin yaydığı xəbərdə 35 yaşlı argentinalı yarımmüdafiəçinin müddəti yayda başa çatacaq müqaviləsinin yenilənməyəcəyi qeyd edilib. Onunla danışıq aparılmadığı bildirilib. Di Mariya “Yuventus”a 2022-ci ilin yayında azad agent kimi keçib. O, A seriyasında 24 oyuna çıxıb, 4 qol vurub, 4 məhsuldar ötürmə verib.

Leandro Paredes də Turini tezliklə tərk edəcək. Di Mariya ilə birlikdə Argentina yığmasıyla DÇ-2022-nin qalibi olan yarımmüdafiəçinin də müqaviləsi yenilənməyəcək. Başqa sözlə, 28 yaşlı yarımmüafiəçi müqavilə ilə məxsus olduğu PSJ-yə qayıdacaq.

Adrien Rabyonun da klubdan ayrılacağı praktiki olaraq dəqiqləşib. Onun müqaviləsi iyunun 30-da qüvvədən düşəcək. Rəhbərlik isə fransalı yarımmüdafiəçiyə yeni təklif irəli sürməyib. Rabyonun “Mançester Yunayted”in maraq dairəsində olduğu məlumdu. Bu komandanı çalışdıran Erik ten Haq onu sərəncamında görmək istəyir.

Amma Karlo Pinsolyo kluba lazım olub. Rəhbərlik onunla müqaviləni yeniləyib. Klubun rəsmi saytının yaydığı xəbərə görə, 33 yaşlı qapıçı ilə sözləşmənin müddəti 2025-ci ilin iyununa qədər artırılıb. “Yuventus”un yetirməsi olan italiyalı futbolçu bu mövsüm rəsmi oyuna çıxmayıb. Ötən mövsüm isə Karlo yalnız bir oyunda iştirak edib. Ümumiyyətlə, Karlo 2010-cu ildən “Yuventus”a məxsus olsa da, Turin klubunda cəmi 5 rəsmi oyunda meydana çıxıb. O, indiyədək müxtəlif klublarda icarə əsasında oynayıb.