Vaqif Cavadov: “İnanmıram ki, kollektivin hansısa üzvü şərəfsiz işə qol qoysun”
Srağagün birinci divizionun “Sumqayıt-2” – Şamaxı-2” qarşılaşmasında ölkə futbolunda nadir rast gəlinən olay yaşandı.
“Kimyaçılar” ilk yarıda 3 qol vuranda hər kəs kimi, mən də matçın taleyinin həll olunduğunu düşünürdüm. Hətta 80-ci dəqiqəyə qədər meydan sahibləri bu üstünlüyü qoruyurdu. Ancaq sonra vəziyyət 180 dərəcə dəyişdi. Zaur İsmayılovun çalışdırdığı “şirlər” 14 dəqiqəyə rəqibin qapısından 4 qol keçirməklə tribunaya toplaşan yerli azarkeşlərə şok yaşatdı.
Matçdan sonra azarkeşlər kimi “Sumqayıt” rəhbərliyi, akademiyanın məşqçiləri də nələrin yaşandığını düz-əməlli başa düşə bilmirdi. Hamı sanki yuxu gördüyünü düşünür, 14 dəqiqəyə belə geridönüşün olduğuna inanmırdı və daha dəqiq desəm, inanmaq istəmirdi. Ancaq olan olmuşdu...
Görəsən, nə baş verdi? Ardıcıl iki oyunda qalib gələn, 80 dəqiqə rəqibdən üstün oynayan “kimyaçılar” niyə sonda meydanı məğlub tərk etdi?
Bu suallara cavab tapmaq üçün komandanın baş məşqçisi Vaqif Cavadovla danışdıq:
“Bu qarşılaşma futbolçulara bir daha sübut etdi ki, oyun 90 dəqiqədi. İlk hissədə 3 qol vurmağımız onları bir qədər arxayınlaşdırmışdı. İknci yarının ilk dəqiqələrindən hiss olunurdu ki, uşaqlar konsentrasiyanı itiriblər. Çox çalışsam da, toprlana bilmədilər. Və bunun nəticəsi kimi rəqib inanılmazı bacararaq oyundan qalib ayrıldı”.
Matçdan sonra sosial şəbəkələrdə, ictimaiyyət arasında xoşagəlməz fiklər dolaşır. Əksəriyyətin fikrincə, “Sumqayıt-2”də kimlərsə bilərəkdən zəif oynamaqla rəqibin 4 qol vurmasına şərait yaradıb. Cavadovun söylənilənlərə reaksiyası belə oldu:
“Futbolçularıma inanıram. İnanmıram ki, kimsə nəsə etsin. Oyun başa çatar-çatmaz PFL-in saytı matçın geniş iclmalını yerləşdirdi. Kimsə nədənsə şübhələnirsə, qapımıza vurulan qollara baxa bilər. Bəli, qollarda bəzi futbolçuların səhvləri var. Ancaq bu o demək deyil ki, bunu bilərəkdən edirlər. Matçın yekun nəticəsi ilə bağlı şübhələr varsa, aidiyyatı qurumlar araşdırma apara bilər. Neqativ məqamlar olubsa, günahkarları üzə çıxarmaq çətin deyil. Qeyd etdiyiniz kimi, kim və ya kimlərsə bilərəkdən rəqibin qol vurmasına şərait yaradıbsa, onları cəzalandırmaq lazımdı. Ancaq sonda yenə deyirəm, komandamın hər bir üzvünə güvənirəm. İnanmıram ki, kollektivin hansısa üzvü şərəfsiz işə qol qoysun. Futbolda belə sürprizlər olur. Tək divizionda yox, son turlarda premyer-liqada da geridönüşlərə şahidlik etmişik”.
RƏŞAD
Digər xəbərlər
