"Lənkəranda futbol bayramı idi. Son dəfə stadionumuzda nə vaxt belə anşlaq olduğu yadımıza gəlmir. "Marxal"la qarşılaşmaya 5 mindən çox azarkeş toplaşmışdı. Onlar sona qədər bizə möhtəşəm dəstək verdi. Oyunda da üstün tərəf idik. 90 dəqiqəni rəqibin qapısı önündə keçirdik. Hücumlar, qol imkanları bir-birini əvəz edirdi. Rəqibə bir dəfə cərimə meydançamıza girməyə imkan vermədik. Yaxaladığımız fürsətlərdən yalnız ikisini qola çevirə bildik. Təbii ki, hakim qərəzi də “göz oxşadı”. Oyunun sonlarına yaxın yüzfaizlik penaltini vermədi. Hətta matçdan sonra rəqib futbolçu da topun əlinə dəydiyini etiraf etdi. Amma referi buna məhəl qoymadı. Bundan başqa, rəqib futbolçular 90 dəqiqə ərzində, əsasən də ikinci yarıda “vaxt öldürmək” üçün tez-tez özünü yerə atırdı. Amma ədalət təmsilçiləri itirilən vaxtı ədalətli şəkildə “sığortalamadı”. Təxminən 15 dəqiqə rəqib futbolçular bu şəkildə vaxt “yedi”. Referi isə ikinci yarıya 4 dəqiqə əlavə etdi. Şəki təmsilçisi ilk oyunda da belə hərəkətlərlə tempi aşağı salırdı. Onda da hakim vaxt itkisini 2-3 dəqiqə əlavə etməklə ört-basdır etdi. Bir sözlə, rəqib hər iki matçda bizə qarşı qorxaq futbol oynadı, hakimlər də ədalətsizlik etdi. Bizim prinsipimiz sadədi - udanda da, uduzanda da kişi kimi, qorxmadan oynamaq. Mərhələ keçməyə biz layiq idik. Sərgilədiyimiz kreativ, mübariz oyunla bunu sübut etdik. Onu da deyim ki, Şəki stadionunda oynamaq çox təhlükəlidi. Çünki qazon bərbad gündədi. Orda at yarışının keçirilməsi daha məqsədəuyğun olardı. İntizam Komitəsi tərəfindən texniki məğlubiyyət almağımızın da mübarizəni dayandırmağımızda rolu oldu. Günahımızı danmırıq, daha diqqətli olmalıydıq. Bir aya görə bu cəzanı aldıq. İlk oyundakı nəticə ləğv olunmasaydı, qarşılaşmanı uzatma dəqiqələrinə, ən pis halda penalti seriyasına daşıyacaqdıq. Qısası, bəxt də sanki bizdən üz döndərdi. Amma xöşbəxtik ki, Ləkəran stadionunda möhtəşəm ab-hava, güclü azarkeş dəstəyi var idi. Mərhələni keçə bilməsək də, oyunda və fanatlarımızın qəlbində qalibik. Bildiyiniz kimi, 1-ci divizionda mübarizə aparmaq üçün sənədlərimizi AFFA-ya təqdim etmişik. Çox ümidliyik ki, peşəkar liqada çıxışımıza icazə veriləcək. Cənub bölgəsinə böyük futbolu qaytarmaq lazımdı. İcazə verilməsə belə, əl-qolumuzu yana salmayacaq, Region Liqasında daha yaxşı çıxış etmək üçün hazırlaşacağıq. Məqsədimiz çempion olmaqdı. Bununla həm də 1-ci divizionda oynamağı haqq etdiyimizi göstərəcəyik".

"Lənkəranda gözəl ab-hava var idi. Cavab matçını finala bərabər oyun adlandırardım. Həddən artıq gərgin qarşılaşma oldu. Yerli azarkeşlərin dəstəyi möhtəşəm idi. "Xəzər Lənkəran 42" mərhələ keçmək üçün çox istəkliydi. Odu ki, üzərimizdə həm rəqibin, həm də azarkeşlərin güclü təzyiqi vardı. Onların sürətli hücumlarının qarşısını almaq üçün hədsiz güc sərf etdik. Bizim üçün əsas nəticə idi. İlk oyundakı üstünlüyümüzü qorumaq üçün meydanda döyüşdük. Sevinirik ki, mərhələni adlayan tərəf olduq. "Xəzər Lənkəran 42"yə növbəti mövsümdə uğurlar arzulayıram. Bu klub həqiqətən daha səviyyəli liqalarda çıxış etməyə layiqdi".