Türkiyə futbol Federasiyasında prezident seçkisi yaxınlaşır. İyunun 22-23-də qurum yeni prezidentini seçəcək. Düzdü, indiki başqan Mehmet Büyükekşi cəmi bir il öncə bu vəzifəyə gəlib. Amma həmin vaxt Nihat Özdəmirin istefasından sonra növbədənkənar seçki keçirilmişdi.

Bu il seçiləcək prezident isə qarşıdakı 4 ildə Türkiyə futbolunu idarə edəcək. Büyükekşi hələ ki rəsmən namizədliyini irəli sürməsə də, yenə əsas favorit sayılır. Qeyd edək ki, qaydalara görə bir şəxs namizədliyini irəli sürə bilməsi üçün federasiyanın səsvermə hüququ olan 302 üzvündən 62-nin imzasını toplamalıdı. Qurumun hər üzvünün yalnız bir nəfərə səs vermək hüququ var.

Bu arada srağagün prezidentliyə ilk namizəd peyda olub. Söhbət “Fırat Universiteti”nin professoru Səbahəttin Dəvəcioğludan gedir. O, yazılı açıqlamasında bunları qeyd edib: “Son illərdə Türkiyə futbolunda yaşanan problemlər hər birimizi üzməkdədi. Uzun illər dünya və Avropa futbolu ilə bağlı araşdırmalar, layihələrdə yer almaqla yanaşı, federasiyada, müxtəlif klublarda və liqalarda işləyərək təcrübə qazanmışam.

Bunun sayəsində Türkiyə futbolunun problemlərini anlamışam və çıxış yolu kimi nə etmək lazım olduğunu bilirəm. Bu üzdən namizədliklə bağlı çalışmalara start vermişəm. Əsas motivasiyam ölkə futbolunun problemlərini həll etmək, futbolsevərlərə daha səviyyəli bir futbol izlətdirmək və Türkiyə futbolunun marka dəyərini bütün dünyada tanıtmaqdı. Futbolumuza yeni bir missiya və baxış tərzi qazandırmaq üçün yola çıxırıq. Hər kəsi bu yolda bizimlə olmağa dəvət edirəm. Futbolumuzu birlikdə idarə edəcəyik”.

Səbahəttin Dəvəcioğlu 1968-ci il mayın 19-da Elazığda doğulub. Türkiyə cümhuriyyətinin ilk universiteti sayılan “Qazi Universiteti”nin Bədən Tərbiyəsi və İdman fakultəsinin məzunudu. 2008/09 mövsümündən etibarən “Elazığspor”da idarə heyətinin sədri də daxil olmaqla müxtəlif vəzifələrdə çalışıb. Çoxlu sayda məqalə və kitabı olan Dəvəcioğlu idmanda idarəçilik və iqtisadiyyat mövzularında internet portalları yaradıb.

Çoxyönlü bir idman professoru sayılan Dəvəcioğlu oxatma, cudo federasiyalarında, Elazığ Həvəskar İdman Klubları Federasiyasında çalışıb. Hazırda idmanda idarəçilik, iqtisadiyyat, klubların idarə olunması, sponsorluğu, karyera qurmaq mövzusunda dərslər deyir.

"Football-plus.az"