“Çox möhtəşəm tədbir idi. Azərbaycanın idman tarixinin belə turnirlərlə zənginləşdirilməsi vacibdi. Yarışın həm ölkəmizin dünya reytinqindəki yerinə, həm də minifutbolun inkişafına müsbət təsiri oldu. Hədəf əvvəlcədən qızıl medal idi. Komanda bütün oyunlara yüksək səviyyədə köklənmişdi.

Məşq prosesində və matçlarda ciddi çatışmazlıq olmadı. Bu oyunları oktyabrda keçiriləcək dünya çempionatına hazırlıq mərhələsinin bir hissəsi də saymaq olar. Komanda 6 gün ərzində əvəzolunmaz təcrübə qazandı, azarkeş dəstəyinin dadını bildi. Bir il idi ki, xarici ölkələrin komandaları ilə qarşılaşmırdıq. Buna baxmayaraq, yığma yaxşı təsir bağışladı. Nəinki Qazaxıstanı, hətta serbiyalıları da məğlub edəcəyimizi düşünürdük.

Təəssüf ki, həlledici məqamlarda heyətdə ruh düşkünlüyü yarandı. Minimal hesabla serblərə (2:3) uduzmaq komandanı sarsıtdı. Qazaxıstanla qarşılaşmada motivasiya baxımından problem yaşasaq da, sonadək mübarizə apardıq. Bildiyiniz kimi, penalti seriyasında uduzduq. Nəticəni əsas vaxtda müəyyənləşdirməliydik. Sadəcə, bəxtimiz gətirmədi. Sağlıq olsun, qarşıdakı oyunlarda daha yüksək nəticə əldə edəcəyimizi düşünürəm. Heyətin formalaşması prosesi başa çatmaq üzrədi. Bir çox futbolçunu sınaqdan keçirmək imkanım oldu. Həqiqətən çox perspektivli uşaqlar var. Hazırda dünya çempionatına köklənmişik. O vaxta qədər hazırlaşacağıq.

İyunda Çernoqoriyada, sentyabrda isə Antalyada təlim-məşq toplanışının keçirilməsi nəzərdə tutulub. Federasiya həmin toplanışların yüksək səviyyədə təşkili istiqamətində çalışır. Komandama inanıram. Azarkeşlər bundan sonra meydanda daha təcrübəli yığma görəcək”.