Növbəti mövsümdə premyer-liqada 10 komandanın olacağı artıq dəqiqləşib.

Dünən “Şamaxı” – “Neftçi” oyunundan sonra jurnalistlərin suallarını cavablandıran AFFA-nın icraçı vitse-prezidenti Elxan Məmmədov bu məsələ ilə bağlı sualı cavablandırarkən konkret hansı klubların elitaya gələcəyini deməsə də, aşağı dəstə təmsilçilərindən yalnız “Tovuz Turan” və “Kəpəz”in Lisenziyalaşdırma Qrupuna müraciət etdiyini vurğulayıb. Bu gedişlə elə adı çəkilən iki qərb təmsilçisini 2022/23 mövsümündə premyer-liqada görə biləcəyik.

“Tovuz Turan”dan söz düşmüşkən, bu günlərdə “Football-plus.az” saytına “boz qurdlar”la bağlı məlumat daxil olub. Mənbəmizin sözlərinə görə, elitaya hazırlaşan tovuzlular yaxın vaxtlarda yeni təmirdən çıxan stadionda daha bir yenilik etməyi planlaşdırır. Belə ki, klub rəhbərliyi AFFA-nın dəstəyi ilə komandanın ev oyunlarını keçirdiyi arenanın qazonunu dəyişdirəcək. Söylənilənlərə inansaq, arytıq mayın sonunda indiki süni örtük çıxarılacaq və əvəzinə daha müasir, Şamaxı şəhər stadionunda olduğu kimi ikinci kateqoriyaya aid yeni süni örtük salınacaq.

RƏŞAD