"Bu mövsüm 1-ci divizionda çıxış etsək də, ev oyunlarını doğma publika qarşısında keçirmək imkanından məhrum idik. Stadionumuzun 20 yaşı var. Amma 7 ildən çox idi futbol matçlarına həsrət idi. Həm qazonda, həm də infrastrukturda nöqsanlar vardı. Buna görə də ev oyunlarını burda keçirməyə icazə verilmədi. Uzun sürən fiziki, mənəvi, maddi əziyyətdən sonra, nəhayət, doğma publika qarşısında çıxışımıza icazə verildi. "Qarabağ-2" ilə oyuna icra başçısı, deputatımız, yerli ziyallılar, AFFA, PFL və FİF nümayəndələri də gəlmişdi. Sevindirici haldı ki, azarkeşlər stadionu doldurdu və oyun böyük coşqu altında baş tutdu. Hətta 90+4-cü dəqiqədə qol buraxaraq uduzandan sonra da azarkeşlər komandanı dəstəkləməyə davam etdi. Bu bizi sevindirir və gələcəyə nikbin baxmağa əsas verir. Həm komandanı, həm də stadionu daha da inkişaf etdirməkdə maraqlıyıq. Bu işdə bizə dəstək olan hər kəsə, o cümlədən AFFA, PFL, FİF rəhbərliyinə dərin minnətdarlığımı bildirirəm".

"Azarkeşlərin 7 ildən sonra ilk ev oyununa qonaq kimi gəlməsinə şərait yaratdıq. Onlar qalan görüşləri də pulsuz izləyəcək. Sevindirici haldı ki, son oyunumuza müəllimlər şagirdləriylə, atalar övladlarıyla gəlmişdi. Azarkeşlər arasında gənclər çoxluq təşkil edirdi. Məqsədimizdən biri də rayonda gəncləri futbola cəlb etmək, zərərli vərdişlərdən uzaqlaşdırmaqdı. Stadionumuzun tutumu 8 mindən çoxdu. Son oyuna 4,5 mindən çox adam gəlmişdi. Hətta ikinci hissədə də təşrif buyuranlar oldu. Növbəti mövsüm girişi pullu edəcəyik, 1 manatdan bilet satılacaq. Fikrimcə, bu qiymət hamının cibinə uyğun olacaq. Hər oyuna ən azı 4-5 min azarkeşin toplaşması 4-5 min manat deməkdi. Bu pulla, heç olmasa, stadionun minimum xərclərini ödəyəcəyik. Bildiyiniz kimi, növbəti mövsümdən divizionda həm səviyyə, həm də komandaların sayı artacaq. Əsas məqsədimiz "İmişli"ni yeni “futbol ili”nə hazırlamaqdı. Rayonumuz futbol ənənələrinə malikdi. Bu üzdən növbəti mövsüm daha yaxşı çıxış etmək, maddi şəraitimizi yaxşılaşdırmaq və qısa müddətə premyer-liqaya yüksəlmək istəyirik".