“Fənərbaxça”nın başına gələn qəribə olayla bağlı yeni xəbər var.

“Football-plus.az” xəbər verir ki, əsas heyətin daimi üzvü sayılmamasına rəğmən, faydalı oyunçulardan biri olan Miha Zayts 2019-un yanvarında İtaliya təmsilçisi “Empoli”dən transfer edilib.

28 yaşlı sloveniyalı yarımmüdafiəçi İstanbul nəhənginə 3,5 milyon avroya başa gəlmişdi. “Fənər” bu məbləği hissə-hissə ödəməyi öhdəliyinə götürmüşdü və 2020-nin sentyabrında bu məbləğin son hissəsi ödənilərkən böyük qalmaqal yaşanmışdı.

“Sarı-lacivərdlilər”in qarşı tərəfə 831 min 929 avro borcu qalmışdı. “Empoli”nin məbləğin ödənilməsi üçün göndərdiyi elektron məktubun ardından kluba başqa bir emeyl də gəlmişdi. Əslində isə bu saxta emeyl idi. Sadəcə, “Empoli” rəsmisinin adına bənzər bir ad idi. Yalnız bir hərf fərqli idi.

Gələn ikinci məktubda qeyd olunurdu ki, birinci məktub guya səhvən göndərilib və nəzərə alınmamalıdı. Yəni pulun ikinci məktubdakı hesab nömrəsinə ödənilməsi tələb olundu. Ortada bir fırıldağın ola biləcəyini ağlına da gətirməyən “Fənər” rəsmiləri pulu ikinci məktubdakı hesaba göndərdilər. “Empoli” 10 gündən sonra istanbullulara müraciət ünvanlayaraq pulun gecikməsinin səbəbini öyrənmək istədi.

Şoka düşən “Fənər” rəsmiləri məsələni araşdırarkən məlum oldu ki, 830 min avrodan çox pul səhvən Niderlandda maşın alveri ilə məşğul olan bir şirkətin hesabına köçürülüb! Təbii ki, “Fənərbaxça” rəsmiləri həmin şirkətdən dərhal pulun geri qaytarılmasını tələb etdi.

Şirkət pulu geri qaytarmaqdan boyun qaçırandan sonra “Fənərbaxça” Niderland məhkəməsinə şikayət etdi. 2021-ci il avqustun 4-də Gelderland bölgə məhkəməsi həmin şirkətin pulu kluba geri qaytarmalı olması ilə bağlı qərar qəbul etdi. Yeni xəbərlər onu göstərir ki, bu məbləğ hələ də “Fənərbaxça”ya qaytarılmayıb!

Çünki həmin fırıldaqçı həbs cəzası alıb. Bu şəxsin Gelderland əyalətindəki kiçik Dutinxem şəhərində yaşayan və maşınların icarəyə verilməsi, eləcədə alğı-satqısı ilə məşğul olan Brayan olduğu üzə çıxıb.

Məhkəmə onu 830 min avronu mənimsəməkdə günahlandıraraq 18 aylıq həbs cəzasına məhkum edib!

Bundan başqa, o, icazəsiz odlu silah daşımaqda da günahkar bilinib.