"Turan Tovuz" - "Sumqayıt" qarşılaşmasında qonaqların heyətində debüt gerçəkləşdi.

Gənc qapıçı İlnur Valiev start heyətində yer aldı. Rusiya parportuna sahib qolkiper 2 qol buraxsa da, komandası rəqibi 3:2 hesabı ilə üstələdi. Həm matç, həm debütü, həm də başqa mövzularla bağlı onunla danışdıq.

- Bu gün "Sumqayıt"da debütün reallaşdı, təəssüratın maraqlıdı...
- İlk dəqiqələrdən həyəcan, narahatlıq vardı. Amma oyunun gedişində bunlar aradan qalxdı. "Sumqayıt"da debüt etməyimə çox xoşbəxtəm. Başda Samir müəllim olmaqla bütün kollektivimizə təşəkkür edirəm ki, mənə güvənib şans verdilər və dəstək oldular.

- Qarşıdakı oyunlarda da qapını qorumağa özünü hazır sayırsan?
- Bu barədə nəsə deyə bilmərəm. Kimə şans verib-verməməyi baş məşqçimiz müəyyənləşdirir.

- Sən özünü müntəzəm oynamağa hazır sayırsan?
- Bəli. İnşallah, şans verilsə, özümü daha yaxşı tərəfdən göstərəcəm.

- Hazırda çempionatın sonuncu dövrəsidi. Bu mərhələ olduqca gərgin, mübarizəli və həyəcanlı keçəcək. "Sumqayıt"ın da elitanı tərk etmək ehtimalı var. Bunun məsuliyyətini dərk edib sona qədər döyüşməyi göz önünə almısan?
- Əlbəttə. Hər qarşılaşmada mübarizə aparmaqla oyunumuzu göstərəcəyik.

- Perspektivli qapıçısan, Rusiya vətəndaşısan, Azərbaycan yığmasında oynamaq təklifi olsa, qəbul edərsən?
- Təklif gəlsə, imtina etmərəm. Azərbaycan millisini seçərəm.

ABDULLA İSMAYILOĞLU