Dünya çempionatı ilə bağlı yaranmış fasilənin ardından həftəsonu bərpa olunacaq Türkiyə çempionatında prinsipial rəqib “Fənərbaxça” ilə oyuna hazırlaşan “Trabzonspor” acı bir sürprizlə qarşılaşıb.

Football-plus.az xəbər verir ki, superliqanın son çempionunun sabiq forvardı Andres Korneliusun meneceri komandadan pulunu tələb edir. Danimarkalı futbolçunun nümayəndəsi Per Steffensen trabzonluların ona 3 milyon 529 min 721 lirə və 1 milyon 411 min lirə məbləğində ayrı-ayrı iki borcunun olduğunu bildirərək məhkəməyə şikayət edib!

Qeyd edək ki, Kornelius ötən mövsüm sərgilədiyi oyunla həm çempionluqda mühüm rol oynamış, həm də fanatların sevimlisinə çevrilmişdi. 29 yaşlı futbolçu 2021/22-də superliqada 15 qol, 5 məhsuldar ötürməlik performans sərgiləmişdi. Kornelius bu mövsümün əvvəlində gözlənilmədən Trabzondan ayrılmaq istədiyini bildirərək 6 milyon avro qarşılığında sabiq klubu “Kopenhagen”ə yollanmışdı. “Kopenhagen”lə 2027-ci ilə qədər müqavilə imzalayan Kornelius hələ ki bu klubda 22 rəsmi oyunda 7 qol, 1 məhsuldar ötürmə ilə fərqlənib. Danimarka yığmasında isə o, indiyə qədər 46 oyunda 13 qol vurub.