Dünən Türkiyə çempionatının 26-cı turunun açılış oyunu çərçivəsində lider ''Qalatasaray''ın superliqada 14 oyunluq tarixi qələbə seriyası Konyada başa çatdı.

"Football-plus.az" xəbər verir ki, ''Cim-Bom'' 1:2 hesabı ilə uduzmaqla oktyabrın ortalarından bu yana ilk dəfə rəsmi bir qarşılaşmadan məğlubiyyətlə ayrılmış oldu.

Matçın son anlarında iki qapıçı arasında münaqişə yaşanması diqqətdən qaçmadı. ''Konyaspor'' əsas vaxta əlavə olunmuş 3-cü dəqiqədə Oğulcan Ülgünün sayəsində qələbə qolunu vurdu. Konyalıların qapıçısı İbrahim Şehiç meydanın ''Qalatasaray''a aid hissəsinə qədər qaçaraq qolu çılğın şəkildə komanda yoldaşları ilə birlikdə qeyd etdi.

Daha sonra o, üzünü ''Qalatasaray'' fanatlarının olduğu sektora tutaraq əlini qulaqlarına qoydu. Yəni bir növ ''Cim-Bom''un forvardı Mauro İkardinin qol sevincini yamsıladı. Daha öncə ölkəmizdə də çıxış edən və 5 mövsüm ''Qarabağ''ın şərəfini 34 yaşlı bosniyalı əlcək sahibinin bu hərəkəti ''Qalatasaray''ın qapıçısı Fernando Musleranın xoşuna gəlmədi. Təcrübəli uruqvaylı qapıçı Şehiçin yanına gələrək onu arxadan itələdi və narazılığını bildirdi. Müvazinətini itirən Şehiç yıxılmaqdan son anda qurtuldu. O da Musleraya qarşılıq verməyə çalışınca iki qapıçı arasında münaqişə yaşandı.

Bu münaqişə yalnız digər oyunçuların araya girməsi ilə sakitləşdi. Hakim Zorbay Küçük hər iki qapıçıya sarı vərəqə göstərib. Adətən sakit xarakteri və rəqiblərə qarşı centlmenliyi ilə tanınan Muslera son mundialda da çılğınlığı ilə diqqət çəkmişdi. O, Qana ilə qarşılaşmadan sonra hakimlərə təzyiq göstərdiyi üçün FİFA tərəfindən 4 oyunluq cəza almışdı. Amma bu cəza yalnız yığma səviyyəsindəki oyunlara şamil olunur.

Əli