Region Liqasında qrup oyunları başa çatdı. Bu mərhələni uğurla başa vuran komandaları qarşıda pley-off matçları gözləyir. Liqada çıxış edənlərdən dördünün növbəti mövsümdən birinci divizionda mübarizə aparacağı dəqiqləşdiyindən bu turnirə maraq bir qədər də artıb.

"Football-plus.az" olaraq Region Liqası üzrə İşçi Qrupun üzvü, AFFA-nın Uşaq və Gənclər üzrə Yarışların Təşkili Departamentinin rəhbəri Yusif Vəliyevlə söhbətdə həm qrup mərhələsini dəyərləndirdik, həm də diviziona namizəd komandalar barədə danışdıq.

- Öncə bir məsələyə aydınlıq gətirməyinizi istərdik. Yayılan xəbərlərə inansaq, Region Liqasında çıxış edən komandalara verilən qonorar artırılıb. Yəni əvvəl hər ev oyununa görə 300 manat nəzərdə tutulmuşdusa, indi məbləğ 500 manat olub.

- Belə bir şey yoxdu. Əvəlcədən nə nəzərdə tutulmuşdusa, həmin məbləğ də verilir. 300 manat yerində qalıb.

- Qrup mərhələsi başa çatıb. Bu mərhələni istədiyiniz səviyyədə keçirə bildiz?

- İldən-ilə Region Liqasında səviyyə artır. Artıq komandalar təşkilatçılıq baxımından işə daha peşəkar yanaşır. Ancaq çatışmazlıqlar da oldu ki, bu da gözlənilən idi. Hər nə qədər səviyyənin artdığını söyləsək də, bura həvəskarlar liqasıdı. Müəyyən işlərdə problemlər ortaya çıxdı. Ancaq onları da vaxtında aradan qaldırmağı bacardıq.

- Bəzi matçlarda təşkilatçılıqla yanaşı, hakim idarəçiliyi ilə bağlı da narazılıqlar yaşandı. Bu nədən qaynaqlanırdı?

- Hakimlikdən narazı qalan komandalar videoçəkilişləri bizə göndərir. Biz isə onu Hakimlər Komitəsinə yönəldirik. Hər nə qədər Region Liqasında keçirilən oyunların məsuyliyyəti üzərimizdə olsa da, hakimliklə bağlı qərar vermək bizlik deyil. Bu sahənin öz peşəkarları var ki, qərarı da onlar verməlidi. Ola bilsin, bəzi qarşılaşmalarda hakimdən narazılıq olub. Hakimlər Komitəsi məsələni araşdırandan sonra qərarını verib.

- Region Liqasında çıxış edən 4 komandanın növbəti mövsümdən birinci divizionda mübarizə aparacağı dəqiqləşib. Komandaları yaxından tanıyan biri kimi sizinlə bu yöndə məsləhətləşiblər?

- Məsləhətə ehtiyac yoxdu. Biz hər həftə liqada keçirilən oyunlar barədə raport hazırlayıb AFFA rəhbərliyinə təqdim edirik. Onlar bütün komandalar barədə ətraflı, dolğun məlumata malikdi. Bizm işimiz turnirin təşkilidi.

- Şəxsi fikriniz bilmək maraqlı olardı. Sizcə, hansı komandaların peşəkar liqada çıxış etmək şansı var?

- Bağışlayın, bu sualınıza cavab verə bilməyəcəm.

- Pley-off oyunlarının təqvimi müəyyənləşib?

- Bu həftənin sonunda pley-off oyunlarına start veriləcək. Ümid edirəm ki, azarkeşlər maraqlı oyunlara şahidlik edəcək.

RƏŞAD