WBA, IBF və WBO versiyaları üzrə superağır çəkidə dünya çempionu Aleksandr Usikin (20-0) promouteri Aleksandr Krasyuk bildirib ki, ukraynalı boksçunun düşərgəsi WBC versiyası üzrə superağır çəkidə çempion Tayson Füri (33-0) ilə keçirilməsi gözlənilən birləşdirici döyüşün mükafat fondunun bölüşdürülməsində güzəşt etməyəcək:

"Niyə Füri Usiklə müqayisədə çox pul qazanmalıdı? Yalnız ona görə ki, ingiltərəlidi? Kişi, bu ki idmandı! Söhbət təkcə peşəkar boksdan getmir. Böyük pullar qazanmaq istəyirsənsə, Hollivuda get. Kralsansa, bunu sübut et. Üç kəmərin sahibi olan oğlana sübut et. Bununla belə, mən gerçəkdən mümkün döyüşlə bağlı müqavilə məsələsində nikbinəm. Buna mane olası yeganə adam Füri özüdü. Usik çox çevikdi, pul onun üçün heç vaxt vacib amil olmayıb. O bilir ki, rinqdə uğur qazansa, pul gələcək. Məni narahat edən yeganə məqam Taysonun mövqeyidi. Füri indiki populyarlığını, statusunu itirməkdən qorxursa – Usiklə döyüşdə bunları itirmək şansı böyükdü - , riskini əsaslandırmaq üçün daha böyük pay istəyə bilər. Bəlkə də bu, onun karyerasındakı ən riskli döyüşdü. Ancaq qəlbimin dərinliklərində inanıram ki, Taysonun döyüşçü ürəyi var, ədalətli şərtlər irəli sürəcək, müqavilə ətrafında boş-boşuna fırlanmayacaq. Onda bu döyüşü ən qısa vaxtda elan edə bilərik”.

Usiklə Füri arasında birləşdirici döyüşün yazda keçirilməsi gözlənilir. Bir daha xatırladaq ki, ukraynalı son döyüşdə Entoni Coşuanı, britaniyalı isə Derek Çisoranı məğlub edib.