Fevralın 7-də birinci divizionda ikinci dövrə start götürəcək. Aşağı liqa təmsilçiləri hazırlığı başa vurmaq üzrədi.

Football-plus.az olaraq, son yeniliklərlə tanış olmaq üçün "Zaqatala"nın baş məşqçisi Rüstəm Məmmədovla əlaqə saxladıq:

"Səfərdə iki yoxlama matçı keçirdik. "Kəpəz-2" ilə 2:2, "Qəbələ-2" ilə 3:3 hesablı heç-heçə etdik. Amma “çempionata tam hazırıq” desəm, düzgün olmaz. Çünki az yoxlama oyunu keçirdik, istədiyimiz futbolçuları heyətə cəlb edə və komandanı tam komplektləşdirə bilmədik. Yeganə sevindirici məqam futbolçuların fiziki hazırlığının normal olmasıdı. Məşqləri davam etdiririk. Heyətin komplektləşməsi və oyun fəlsəfəmizin formalaşması ən azı 3-4 çempionat oyunundan sonra bəlli olacaq. Bildiyiniz kimi, biz ev komandası kimi tanınırıq. Bu mövsüm doğma publika önündə hələ uduzmamışıq. Çempionatın ikinci yarısında səfər sondromunu aradan qaldırmaq istəyirik. Çalışacağıq ki, səfər oyunlarında özümüzü daha yaxşı tərəfdən göstərib xallar qazanaq".