“Benfika” qış transfer əməliyyatlarını davam etdirir. Lissabonluların sıralarına daha iki futbolçu qoşulub.

Portuqaliya çempionatının lideri Kasper Tenqstedti transfer edib. “Rusenborq”un hücumçusu Portuqaliya klubuna 7 milyon avroya başa gəlib. 22 yaşlı danimarkalı futbolçunun lissabonlularla imzaladığı müqavilənin müddəti 2028-ci il iyunun 30-na qədər nəzərdə tutulub. Əvvəllər ölkəsində “Horsens” və “Midtüllann”da, həmçinin Almaniyada “Nürnberq”in 2-ci komandasında çıxış edən Tenqstedtin peşəkar karyerası ərzində 142 oyuna 73 qol vurub 31 məhsuldar ötürmə etdiyini bildirək.

“Benfika” Andreas Şelderupu da sıralarına qatıb. Norveçliyə görə “Nordşellann”a 14 milyon avro ödənilib. 18 yaşlı yarımmüdafiəçi ilə imzalanan müqavilənin müddəti də 2028-ci ilin yayına qədərdi. “Bude/Qlimt”in yetirməsi olan Andreas “Nordşellann”a 2020-ci ilin yayında keçib. Danimarka klubunda 56 oyun keçirən futbolçu 17 qol vurub və 5 məhsuldar ötürmə edib. “Benfika”nın onun başqa kluba satışından əldə edəcəyi məbləğin 20 faizi “Nordşellann”a çatacaq. Maraq üçün Şelderupun “Liverpul”un hədəfində olduğunu, ancaq Portuqaliyada oynamağa üstünlük verdiyini də bildirək.
Tomaş Tavareş isə Lissabon klubunu tərk edib. 21 yaşlı portuqaliyalı müdafiəçi 3 milyon avroya “Spartak”a (Rusiya) satılıb.