MOİK-in iki futbolçusunun – Emin Mehdiyev və Fərmail Əliyevin danışılmış oyunlarda iştirakına görə ömürlük futbol ilə əlaqədar hər hansı fəaliyyətlə məşğul olmaq hüququndan məhrum edilib.

Bununla bağlı AFFA-nın saytı dünən xəbər yayıb. Bir neçə gün öncə isə “Football-plus.az”saytı olaraq, bununla bağlı xəbər paylaşmış, adını qeyd etdiyimiz futbolçuların hüquq-mühafizə orqanları tərəfindən sorğu-suala çəkildiyini vurğulamışdıq.

Xatırladaq ki, Emin və Fərmail “Səbail”ilə kubok görüşündə şərəfini qoruduqları MOİK-in məğlubiyyətini pul qoyuluşu ediblər. Həmin vaxt “hərbiçilər”in baş məşqçisi artıq komandadan ayrılan Şəhriyar Əliyev idi. Hazırda Region Liqasında çıxış edən “Ağsu-Siti”nin “sükanı arxasında” olan Şəhriyar bəylə söhbətdə başııbəlalı “Səbail” görüşünü yada saldıq.

- Emin Mehdiyev və Fərmail Əliyevdən bunu gözləyirdiz?
- Hələ də özümə gələ bilmirəm. ALLAh şeytana lənət eləsin. Fərmaildən...

- Sözünüzdən belə başa düşmək olar ki, Mehdiyevdən fərqli, Fərmail Əliyevdən bunu gözləmirdiz...
- Nə deyim? Emin bəzən ona verilən tapşırığı meydanda yerinə yetirmirdi. Öz bildiyi kimi oynayırdı. Fərmail isə belə deyildi.

- Bizdə olan məlumata görə, hər ikisi dindirilmədə “bilirdik ki, oyunu uduzacağıq. Bu səbəbdən komandamızın məğlubiyyətinə pul qoyuluş etdik”söyləyiblər.
- Allah onlara lənət eləsin, qalib ordunun komandasının adını biabır etdilər. Bilirsiz komanda həmin oyuna necə hazırlaşırdı? Tarix yazmaq, növbəti mərhələyə yüksəlmək istəyirdik. Matça da ciddi hazırlaşmışdıq. Uşaqlar sonadək mübarizə aparcaqlarına söz vermişdilər.

- Sizcə, MOİK-də “oyunsatan” başqa futbolçular yoxdu?
- Qətiyyən. Başqaları olsaydı, bu gün onların da adı ictimaiyyətə açıqlanardı.

- “Səbail”ilə görüşdə Mehdiyevi artıq birinci hissədə meydandan çıxarmısız. Oyunundan şübhələnirdiz?
- Səhv etmirəmsə, zədəyə görə onu erkən əvəzlədim. Oyun vaxtı şübhləndiyim məqam yox idi. Sonradan eşitmişik ki, bunlar belə edib. İndi də yadıma düşəndə əsəbləşirəm. Bu üzdən çox danışa bilməyəcəm.

RƏŞAD