“Şamaxı-2” hazırlığı “ASK Arena”da keçir
"Şamaxı-2" də toplanışa start verib.
Football-plus.az xəbər verir ki, divizion təmsilçisinin planları maraq doğurmaya bilməz.
Detallı məlumat almaq üçün 3 gün öncə komandanın baş məşqçisi Zaur İsmayılovla əlaqə saxladıq. Onun dedikləri belə oldu:
"Yanvarın 7-dən bir araya gəlmişik. Toplanışı Bakıda keçiririk. "ASK Arena"da məşq edirik. Hələlik komandadan nə gedən, nə də gələn var. Amma heyətə yeni oyunçular cəlb etməkdə maraqlıyıq. 2-3 futbolçunu izləyirik. Onları baxışa çağıracağıq. Bundan başqa, U-19 komandamızdan da perspektivli gəncləri cəlb etməyi planlaşdırırıq. 4 yoxlama matçı nəzərdə tutulub. Yanvarın 16-da "Qaradağ Lökbatan", 21-də MOİK , 28-də "Sumqayıt-2" ilə gücümüzü sınayacağıq. 4-cü rəqibimizin adına hələ aydınlıq gəlməyib. Əlavə olaraq onu da qeyd edim ki, bir-iki futbolçumuzun əsas komandaya cəlb olunması mümkündü".
"Qaradağ Lökbatan"la oyunla bağlı informasiya əldə etmək üçün dünən yenidən Zaur İsmayılovla əlaqə saxladıq. Cəhdimiz alınmasa da, köməkçisi Ruslan Əmircanovun fikrini öyrəndik:
"Toplanış çərçivəsində ilk yoxlama oyununu keçirdik. Uşaqlar yüklənmələr üzündən yorğun idi. Buna rəğmən, mübarizə apardılar. Baxışda yeni oyunçular olduğundan fasilədən sonra heyəti tam dəyişdik. Belə oyunlarda nəticədən çox, təcrübə qazanmaq, futbolçuların nəyə qadir olduğunu bilmək əsasdı. "Qaradağ Lökbatan" 1-ci divizionda çempion olan, güclü klublardandı. Belə komandaya qarşı oynamaq çox xoşdu. Rəqiblə yanaşı, bizim də qol imkanlarımız oldu, sadəcə, yararlana bilmədik. Görüş “Qaradağ Lökbatan”ən 2:0 hesablı qələbəsiylə bitdi. Səhvlərimiz üzərində işləyib aradan qaldıracağıq. Qarşıdakı oyunlarda daha yaxşı çıxış etməklə çempionatın 2-ci dövrəsinə hazır olacağıq".
ABDULLA İSMAYILOĞLU
Digər xəbərlər
