PFL təmir olunan şəhər stadionunu təftiş edəcək
Hazırda elita klublarıyla yanaşı, divizion təmsilçiləri də təlim-məşq toplanışı və transfer çalışmaları həyata keçirir.
"İmişli" də fasilədən maksimum yararlanaraq doğma şəhərdə toplanışı davam etdirir. Heyətə yeni oyunçular da cəlb olunub. Daha detallı məlumat almaq üçün komandanın baş məşqçisi Ruhid Usubovla əlaqə saxladıq:
"Doğma şəhərimizdə toplanışa start vermişik. 4 futbolçu ilə yollarımızı ayırdıq. Hər iki qapıçımızı yola saldıq. Gedənlərin əvəzinə iki yeni oyunçu cəlb etmişik. Onlardan biri qapıçı Pərviz Zeynalov, digəri "Sumqayıt"da və "Araz Naxçıvan"da çıxış edən, İmişlidən olan Nəbi Məmmədovdu. Daha 1 qapıçı və 2 forvard alsaq, transfer dönəmini uğurlu saymaq olar. Bundan başqa, İmişlidən və qonşu rayonlardan istedadlı yeniyetmələrin axtarışındayıq. Seleksiya nəticəsində bir neçə 15-17 yaşlı uşağı məşqlərə cəlb etmişik. Onları komandada saxlamağı düşünürük".
Gənc mütəxəssis çempionatın 2-ci yarısında ev oyunlarını doğma meydanda keçirib-keçirməyəcəklərinə və sponsor məsələsinə də aydınlıq gətirdi:
"Daim sponsor axtarışındayıq. Bütün iş adamlarına müraciət etmişik və edirik də. Stadionumuzu əsaslı təmir etdirdik. Ot ördüyü əla vəziyyətdə olmasa da, oynamaq mümkündü. Stadion oyunları qəbul etməyə hazırdı. Amma PFL-dən gəlib yoxlamalı və rəsmi icazə verməlidilər".
ABDULLA İSMAYILOĞLU
Digər xəbərlər
