Birinci divizionda 14-cü tura yekun vuruldu. Diqqəti çəkən qarşılaşmalardan biri də "Araz Naxçıvan"la "Neftçi-2" arasında baş tutdu.

Football-plus.az xəbər verir ki, oyun məhsuldarlığı ilə yanaşı, qırmızı və sarı vərəqlər baxımından da “göz oxşadı”. Matçla bağlı Muxtar Respublika təmsilçisinin baş məşqçisi Azər Bağırovun fikirlərini öyrəndik.

- Oyun haqda təəssüratınızı bölüşərdiz…
- Gərgin və gözəl oyun baş tutdu. "Neftçi-2" çempionatın favoritlərindəndi. Rəşad Abdullayev yaxşı, döyüşkən komanda formalaşdırıb. "Ağ-qaralar" bizi addım-addın izləyir. Hətta ötən turlarda biz xallar itirəndən sonra liderliyi də ələ almışdılar. Rəqibin heyətində perspektivli futbolçular çoxdu, onların bir qismi "Neftçi"nin əsas komandasında da çıxış edib. Çox yaxşı mübarizə apardılar, qələbə də qazana bilərdilər. Sadəcə, heyətimizdə daha təcrübəli futbolçuların yer alması və qələbə əzmimiz həlledici oldu. Sona qədər döyüşdük və zəfər qazandıq.

- İki futbolçunuz qırmızı vərəqə aldı. Komandanızda intizam aşağı düşüb?
- Təəssüf ki, iki əsas heyət oyunçumuz meydandan qovuldu. Emil Bayramov intizamdan kənara çıxdığına, qapıçımız da hisslərini cilovlaya bilmədiyinə görə qırmızı vərəqə aldı. Bu da oyunun gərginliyindən xəbər verirdi. Ümumilikdə isə komandamızda nizam-intizam yaxşı səviyyədədi.

- İki əsas oyunçunun “qırmızı” alması qarşıdakı turda işinizi çətinə salmayacaq?
- Emillə Vüsalın cəzalı duruma düşməsi, təbii ki, təsir göstərəcək. Amma irəli baxmalı, səhvlərimizi təhlil edib daha yaxşı çıxış etməliyik.

- Hazırda 1-ci divizionun bombardiri futbolçunuz Orxan Əliyevdi. Onun performansından razısız?
- Orxandan daha yaxşı performans gözləyirdik. Onun hər oyunda qol və qollar vurmasını gözləyirdim. Amma elə turlar, matçlar olub ki, fərqlənə bilməyib. Buna rəğmən, ona inanırıq. Ümumilikdə çıxışından razıyam. Amma Orxanın potensialı daha böyükdü.

- "Neftçi-2" üzərində qələbəylə “qış çempionluğu”nu rəsmləşdirdiz. Bu nəticəni gözləyirdiz?
- "Araz Naxçıvan"ın “sükanı arxasına” keçərkən məqsədimiz gələcək üçün böyük klub yaratmaq idi. Ona görə bütün çətinliklərə sinə gərib döyüşməliydik. Düşünürəm ki, qarşımıza qoyulan vəzifənin minimumunu reallaşdırmışıq. Hələ qarşıda görüləcək çox iş var. Nə qədər çətin olsa da, tutduğumuz yolla irəliləyəcəyik

- Bir turdan sonra çempionatda fasilə yaranır. Təlim-məşq toplanışı ilə bağlı planlarınız dəqiqləşib. Yeni transferlər gözlənilir?
- Qarşıdakı oyuna köklənmişik. Son matçımızı qələbəylə tamamlayıb fasiləyə yollanmaq istəyirik. Bir neçə planımız var. İlk dövrə tamamlanandan sonra rəhbərliyə təqdim edəcəyik. Hansı təsdiqlənsə, o plan üzrə də hərəkət edəcəyik.

ABDULLA İSMAYILOĞLU