“Ginnesin Rekordlar Kitabı” bu göstəricini qeydə almadı
Rusiyanın məşhur şərhçilərindən olan Timur Juravel bu aralar qeyri-adi informasiyalar gündəmdədi.
Football-plus.az xəbər verir ki, “Matç TV”nin əməkdaşı Qətərdəki mundialda bütün oyunları stadiondan izləmək istədiyini hələ turnirdən əvvəl verdiyi müsahibədə etiraf etmişdi. Qətərin logistikası həqiqətən də buna imkan verir.
Çünki şəhərlər və stadionlar arasında məsafə azdı. Yalnız Əl-Haur şəhərində yerləşən “Əl-Beyt” stadionu başqalarından bir qədər fərqli ərazidədi. Qrup mərhələsinin eyni vaxtda başlayan 3-cü turunun matçlarına gəlincə, Juravel bir qarşılaşmanın təxminən 30-cu dəqiqəsində stadiondan ayrılaraq paralel keçən matçın oynanıldığı stadiona yollanıb. İndiyə qədər dünyada bu maraqlı layihəni həyata keçirən olmamışdı. Ən azı rəsmi şəkildə kiminsə hansısa mundialın bütün oyunlarını stadiondan cannlı izləməsi barədə məlumat yoxdu. 44 yaşlı Juravel artıq bu mundialın geridə qalan 60 oyununun hamısını stadiondan izləyib! Rekordçu olmaq üçün ona yalnız hər iki yarımfinalı, 3-cü yer uğrunda oyunu və final görüşünü izləmək qalıb. O, müvafiq göstəricidə adının rekordlar kitabına düşməsi üçün müraciət ünvanladıqda isə gözləmədiyi bir cavabla qarşılaşıb. “Ginnesin Rekordlar Kitabı” rusiyalı jurnalistin rekordunu qeydə almaqdan imtina edib! Kitabın araşdırma komissiyası müraciəti qəbul edərək onunla ətraflı şəkildə tanış olub. İlk baxışdan bu rekordun qeydə alınması üçün problem yox idi. Amma kitabın rəsmiləri qeyri-müəyyən müddətə Rusiya və Belarusla bütün əlaqələri kəsiblər. Artıq başa düşdüyünüz kimi, bu, Ukraynadakı hadisələrlə bağlıdı. Ona görə də rekord qeydə alınmayıb. Juravel bu xəbəri belə qarşılayıb:“Çox pis xəbərdi. Amma dünyanın sonu deyil. Adım rekordlar kitabında olmasa da, yaşadığım emosiyalar həyatımın sonuna qədər mənimlə qalacaq. Hər stadiondan çəkdiyim videoları da izləyicilərlə bölüşəcəm”.
