Premyer-liqanın 12-ci turunun mərkəzi qarşılaşması sayılan "Zirə" - "Neftçi" görüşü VAR sistemi olmadan baş tutdu. Bunun səbəbi nə idi?
Football-plus.az olaraq suala aydınlıq gətirmək üçün əvvəlcə PFL-in Media və Marketinq Departamentinin direktoru Sənan Abdullayevlə əlaqə saxladıq:
"Məsələ ilə bağlı “CBC Sport”dan aldığımız məlumata görə, “Zirə” – “Neftçi” görüşü zamanı VAR sistemində hansısa problem olmayıb. Problem internetin kəsilməsindən qaynaqlanıb. Məhz internetlə bağlı nasazlığa görə həmin oyunda VAR sistemini tətbiq etmək mümkün olmayıb".
Hakimlər Komitəsinin VAR layihəsinin əlaqələndiricisi Fəridə Lütfəliyeva isə məsələ ilə bağlı bunları söylədi:
"VAR-ın özündə heç bir problem olmayıb. Bu sistem internet sayəsində işləyir. VAR-a qoşulan fiberoptik internet xəttinin biri qırılmışdı. Ona görə də sistem işləmədi".
ABDULLA İSMAYILOĞLU