Azərbaycanın paralimpiyaçı cüdoçusu İlham Zəkiyev İtaliyanın Kalyari şəhərində təşkil olunan Avropa çempionatında finala yüksəlib.

Football-plus.az xəbər verir ki, J1 kateqoriyası üzrə 90 kiloqramdan yuxarı çəki dərəcəsində çıxış edən ikiqat paralimpiya çempionu mübarizəyə 1/4 finaldan qoşulub. Bu mərhələdə moldovalı İon Basoku "ippon"la yenən Zəkiyev ardınca fransalı Ceyson Qrandriyə də eyni aqibəti yaşadıb.

Bunadək yeddi dəfə analoji yarışın qalibi olan 42 yaşlı idmançı həlledici dueldə ukraynalı Yuri Marçenko ilə qarşılaşacaq.

Bakı-2015 I Avropa Oyunlarının bürünc medalçısı Zakir Mislimov (90 kq, J1) 1/8 finalda Adnan Kuyoviçə (Monteneqro), ardınca italiyalı Valerio Romano Teodoriyə qalib gələrək yarımfinala adlayıb. Lakin bu mərhələdə 47 yaşlı moldovalı paralimpiya çempionu Oleq Kretsul idmançımız üçün keçilməz olub. Mislimov bürünc medal uğrunda mübarizə aparacaq.