"Neftçi" Aslan Kərimovu xəyal qırıqlığına uğradıb - AÇIQLAMA
“Neftçi” srağagün səfərdə "Rapid"ə uduzmaqla Konfrans Liqasına “əlvida” dedi.
Bununla yanaşı, bakılıların göstərdiyi məzmunsuz oyun da azarkeşləri məyus etdi. Flaqmanın avrokuboklarla vidalaşması ilə bağlı Aslan Kərimova müraciət etdik:"Neftçi" "Rapid"ə qarşı cavab görüşündə sərgilədiyi oyunla məni, türklər demiş, xəyal qırıqlığına uğratdı. Çoxları deyirdi ki, "Aris"lə ilk oyundakı məğlubiyyətdən sonra "ağ-qaralar" çox irəli gedə bilməyəcək. Amma bir həftə sonra Bakıdakı cavab matçında 3:0 qələbə qazanaraq mərhələ adlamaqla hamını ümidləndirdi. “Neftçi”nin Vyanadakı məğlubiyyətinin əsası Bakıdakı ilk oyunda qoyuldu. Belə ki, "ağ-qaralar" 2-ci qolu vurandan sonra təşəbbüsə yiyələnməli, oyuna nəzarət etməli olduğu halda, bunu rəqib etdi. Avstriyalılar 60-cı dəqiqədən başlayaraq, güclü pressinq sayəsində "Neftçi"ni qapısı önünə sıxışdırdı və bunun məntiqi nəticəsi kimi uzatma dəqiqələrində qol buraxdıq. Bu, rəqib üçün cavab görüşü ərəfəsində böyük motivasiya oldu. Uğursuzluğu çox şeylə bağlamaq olar. Öncə onu deyim ki, komandada oyun planı yoxdu. Ayrı-ayrı futbolçuları çıxmaq şərtiylə, düşünürəm ki, heyət avrokubok təcrübəsində “pəhrizdədi”. Çoxları deyə bilər ki, komandaya yeni baş məşqçi və oyunзular cəlb olunub, heyət yenidən formalaşdırılır. Bəli, sadalananlar doğrudu, amma uğursuzluğa əsas deyil. Axı "Neftçi" dünən yaranan komanda deyil ki, onun uğursuzluğuna haqq qazandıraq. Ölkənin ən titullu klubudu, yetərincə də avrokubok təcrübəsi var, Avroliqanın qrupunda oynayıb. Yəni hazırda sərgilədiyi oyun "Neftçi"nin adına yaraşmır. "Rapid" bizi yalnız komanda oyunu, ustalıq və istək sayəsində keçdi. Emin Mahmudov son oyunlarda özünü yaxşı tərəfdən göstərir, hücumların təşkilində işinin öhdəsindən gəlir. Çoxları onu tənqid edir ki, niyə qol vurmur, hücumlara çıxmır. Axı Emin hücumçu deyil ki, “partlayışı” ilə göz oxşaya. Açığı, "Rapid"lə cavab oyununda daha istəkliydi, şansı da oldu, zərbəsi tirdən qayıtdı. Amma "ağ-qaralar"ın heyətində nominal hücumçu olan Donyodan Emin qədər hərəkətlilik, fəallıq görmədik. Ümumiyyətlə, komandada hücumçu işi görünmür, qolları da əsasən başqa mövqe oyunçuları vurur. "Rapid"lə hər iki oyunda "Neftçi"nin futbolçuları çoxlu qol imkanını boşa verdi. Həmin imkanlardan yararlansaydılar, bu gün sevinən tərəf biz olardıq. Regekampfın əvəzetmələri gecikdirməsinə gəlincə, iki səbəb görürəm. Birincisi, ehtiyat oyunçular skamyası zəngin deyil. İkincisi, sanki rumıniyalı mütəxəssisin oyunçularına inamı yoxdu. Düşünürəm ki, baş məşqçi beynində formalaşdırdığı oyun planının pozulmasından qorxurdu. Məsələn, Azər Əliyevi daha tez meydana buraxmaq olardı. Eləcə də top saxlamağı bacaran başqa bir futbolçunu. "Qarabağ"ı çıxmaq şərtiylə qalan klublarımız müasir futbolun tempinə uyğunlaşa bilməyib. 120 dəqiqə oynayırsansa, ehtiyat qüvvən zəngin olmalıdı. Regekampf daha çox ilk matçdakı hesabı qorumaq və ya oyunu penalti seriyasına aparmaq üçün əvəzetmə riskinə getmirdisə, bunu hardasa anlamaq olar. Amma rəqibin müdafiəsində boşluqlar varsa və onu cəzalandırmaq mümkündüsə, niyə də Yeqor Boqomolskini, Rəhman Hacıyevi, İsmayıl Zülfüqarlını meydana buraxmayasan?! Ən azı rəqib də yorulmuşdu və bundan istifadə etmək olardı. İstənilən halda, artıq nəticəni dəyişmək mьmkьn deyil. Amma "Rapid" keзilməz rəqib deyildi. "Neftçi" oyun planında inkişaf etməlidi. Çünki komandada oyun üslubu formalaşmayıb. Bu problemi aradan qaldırmasa, ölkə çempionatında da işi çətin olacaq".
ABDULLA İSMAYILOĞLU
Digər xəbərlər
