“Şturm” İstanbul səfərindən qurtulduğu üçün sevinir
Məlum olduğu kimi ''Fənərbaxça'' Çempionlar Liqasının 2-ci təsnifat mərhələsində Kiyev ''Dinamo''su səddini aşa bilmədi.
İstanbul nəhəngi bu rəqibi keçsəydi, növbəti mərhələdə ''Şturm''la qarşılaşacaqdı. Bu arada Qrats təmsilçisinin idman direktoru Andreas Şiker Avstriya mətbuatına diqqətçəkən açıqlamalar verib. Sən demə, ''Ülkər'' stadionunda keçirilən ''Fənərbaxça'' - ''Dinamo'' matçını o da tribunadan izləyibmiş:
''Dinamo'' fiziki cəhətdən çox güclü komandadı. Aylardı rəsmi oyun keçirməsələr də, İstanbulda nəyə qadir olduqlarını göstərdilər. Oyunçuları texniki cəhətdən güclüdü. İşimiz çətin olacaq. Çünki ''Dinamo'' aşkar şəkildə bizdən üstündü! Amma digər tərəfdən İstanbul səfərindən qurtulmağımız yaxşı oldu. Çünki stadion tam bir dəlixananı xatırladırdı. 70 dəqiqə oyunu ayaqüstə izləmək məcburiyyətində qaldım. Çünki oturanda heç nə görünmürdü. Bütün stadion qaynayırdı. Heç bilmirəm, bizim oyunçular belə ab-havaya necə reaksiya verərdi. ''Putin'' təzahüratına gəlincə, açığı, bunu eşitmədim. Amma həqiqətən də belə bir şey qışqırıblarsa, bu dəlilikdi''.
İndi ''Fənərbaxça'' mübarizəni Avropa Liqasının 3-cü təsnifat mərhələsində davam etdirməli olacaq. Orda isə rəqib Çexiya təmsilçisi ''Slovatsko''du. İlk oyun avqustun 4-də İstanbulda keçiriləcək. Bu komanda daxili çempionatda ötən həftəsonu ilk turda ''Brno'' ilə səfər oyunundan 2:2-lik bərabərliklə ayrıldı. Buna baxmayaraq, cəmi 24 min əhalisi olan Uqerske-Qradişte şəhərini təmsil edən bu kollektiv ''Fənər''lə oyun ərəfəsində çox iddialıdı. Baş məşqçi Martin Svedik bunları deyib:
''Bizim normal bir hücum oyunçusuna ehtiyacımız var. Amma heyəti artıq göndərmişik və bu oyunçularla ''Fənərbaxça''ya müqavimət göstərəcəyik. Rəqibimiz çox səviyyəli olsa da, onları keçə biləcək gücdəyik. ''Brno'' ilə oyun ölçü vahidi olmamalıdı. ''Fənər''lə qarşılaşma tam fərqli atmosfer və ssenari ilə keçəcək. Qorxmağımız üçün səbəb yoxdu. Belə rəqiblərlə oynaya bildiyimizin fərqindəyik''.
Komandanın 35 yaşlı təcrübəli oyunçusu Yan Kalabiska isə ''oyunu səbirsizliklə gözləyirik. ''Fənər''in necə oynayacağı çox maraqlıdı. Amma istənilən halda qarşılarında güclü bir rəqib olacaq'' açıqlamasını verib.
Bu arada ''Fənər'' UEFA-ya göndərdiyi 25 nəfərlik heyətdə müəyyən dəyişikliklər edib. Siyahıya ''Marsel''dən transfer edilən Luan Pereslə ''Flamenqo''dan birilliyə icarəyə götürülən Qustavo Enrikenin adı əlavə edilib. Eləcə də Jorje Jezuşun planlarına daxil olmayan Lemos ilə Berişanın adı sürpriz şəkildə siyahıya salınıb. Amma əvəzində zədəli olan Sərdar Əziz, İrfan Can Kahveci, yeni transfer Joao Pedro, eləcə də Pelkas ilə Tisseranın adı siyahıda yoxdu! Siyahıda olmasına rəğmən, zədəsi tam sağalmayan qapıçı Altay Bayındır böyük ehtimalla ilk oyunu buraxmalı olacaq. Superliqada 1-ci turun oyunu üçün qorunacaq Altayı ''Slovatsko'' ilə oyunda Ərtuğrul Çətinin əvəzləyəcəyi gözlənilir. Sonda onu bildirək ki, “Fənərbaxça” “Əl-Əhli” ilə Ezgan Alioskinin keçidi ilə bağlı anlaşma əldə edib. Dünən danışıqlar üçün İstanbula gələn Şimali Makedoniya yığmasının üzvünün birilliyə icarəyə götürüləcəyi gözlənilir.
ƏLİ
Digər xəbərlər
