“Akademiya Puşkaş”la görüşə yeni taktika və start heyəti ilə çıxdıq" - Stanislav Çerçesov
“Ferentsvaroş”un baş məşqçisi Stanislav Çerçesov dünən Macarıstan çempionatının ilk turunda “Akademiya Puşkaş” üzərindəki qələbədən (1:0) sonra mətbuat konfransında iştirak edib.
Football-plus.az xəbər verir ki, rusiyalı mütəxəssis Çempionlar Liqasının təsnifat mərhələsinin görüşlərinin komandaya təsir etdiyini bildirib:
“Biz bilirdik ki, bu, ağır oyun olacaq. Çünki “Akademiya Puşkaş” çempionatda bizim ciddi rəqiblərimizdəndi. Bratislavadakı cavab görüşü (“Slovanla”la oyun nəzərdə tutulur – red.) komandanın təkcə fiziki yox, emosional baxımdan da yorub. Məhz buna görə biz “Akademiya Puşkaş”la görüşə yeni taktika və start heyəti ilə çıxdıq. Yeni mövsümə qələbə ilə başladığımıza görə şadam. Bu gün seçdiyimiz struktur pis işləmədi. Düzdü, müdafiə və hücumda elə məqamlar oldu ki, bu, mənim xoşuma gəlmədi. Amma əsas odu ki, qələbə qazandıq. Rəqibimiz də oyunun gedişatında taktiki dəyişikliklər etdi, biz də buna uyğunlaşmalı olduq. Biz daim futbolçularımızın oyunlarını məşqçi qərarhagında müzakirə və koordinasiya edirik. Görürəm ki, bu, Kristoffer Zakariassenə müsbət təsir edib. O, daim inkişafdadı. Mən Kristofferin oyunundan razıyam və o, daha güclü çıxış etmək üçün addım-addım irəliləyir”.
