Uzun sürən səssizlikdən sonra “Şamaxı”da “sular duruldu”. Şübhəsiz ki, bunun da səbəbi boş qalan Müşahidə Şurasının sədri postuna Elçin Usubun gətirilməsidi. Bundan sonra komandanın məşqçilər korpusu da təsdiqləndi. Amma bölgə təmsilçisini növbəti mövsüm meydana Cavid Hüseynov yox, Vüqar Əsgərli çıxaracaq. Onun köməkçiləri isə son mövsümdə baş məşqçi olan Rüstəm Əliyev, Cavid Hüseynov və Elhad Nəziridi.
Məlum olduğu kimi, mövsüm başa çatandan sonra “şirlər”in heyətinin 60 faizindən çoxu ilə yollar ayrıldı. Bununla belə, komanda iyulun 1-dən Cavid Hüseynovun rəhbərliyi altında yeni mövsümün hazırlığına start verib. Dünən isə “Turan Tovuz”la yoldaşlıq matçı keçirib. Bu qarşılaşma üçün bilet satışı da təşkil olunub. Bəli, bu, Azərbaycan futbolu üçün qeyr-adi hadisədi. Bütün bunlara və bizi maraqlandıran başqa suallara cavab tapmaq üçün kluba yeni təyin olunan baş menecer Kamran İsmayılovla əlaqə saxladıq.
- Cavid Hüseynovun komandaya baş məşqçi təyin olunacağı gözlənilsə də, Vüqar Əsgərli bu posta gətirildi. Məlum olduğu kimi, Hüseynovun məşqçi kateqoriyası premyer-liqa klubunda baş məşqçi işləməyə imkan vermir. Maraqlıdı, Əsgərli postunda müvəqqəti olacaq?
- Vüqar Əsgərli ilə baş məşqçi, Cavid Hüseynovla isə köməkçi məşqçi kimi müqavilə bağlanıb. Yəni fakt budu. Dünyada belə bir praktika var ki, komandaya cütlük olaraq rəhbərlik edirlər. Bizdə də məşqçilər korpusu cütlük şəklində işləyəcək. Bir-biri ilə sıx əlaqədə olacaqlar. O ki qaldı funksiyaların bölüşdürülməsinə, bu artıq məşqçilərin arasında olan məsələdi.
- Rüstəm Əliyevlə necə razılıq əldə olundu?
- İkitərəfli razılıq əsasında məsələ həllini tapdı. Artıq Rüstəm Əliyevin baş məşqçi müqaviləsinə xitam verilib. Yeni müqaviləyə əsasən isə əsas komandada köməkçi məşqçi işləyəcək.
- Təlim-məşq toplanışının harda olacağı ilə bağlı bir yenilik var?
- Təəssüf ki, müəyyən problemlərə görə komanda gec formalaşmaga başladı. Məşqlərə gec start verdik. Bu gün üçün ölkə xaricində təlim-məşq toplanışı planlaşdırılmır. Amma sözsüz, iş gedir və yeni qərar qəbul oluna bilər.
- Bəs yoldaşlıq görüşləri olacaq? Bu istiqamətdə hansı klublarla danışıq aparılıb?
- İlkin razılaşmaya əsasən planımızda iyulun 22-də "Kəpəz"lə yoldaşlıq oyunu keçirmək var. 26-da isə U-19 yığmamızla qarşılaşacağıq. Bu da faktdı ki, müəyyən qədər rəqib sıxıntısı ilə üzləşirik. Buna baxmayaraq, yenə də bu iki oyunu razılasdırmışıq. Bundan sonra da məşqçilərin istəyinə, tələbinə görə yoldaşlıq oyunlarının sayının artacağı gözlənilir.
- Mövsüm başa çatandan sonra komanda heyətinin 60 faizindən çoxu ilə yolları ayırdı ki, bu da "Şamaxı"nın növbəti "futbol ili"ndə çıxışına mənfi təsir edəcək. Yeni mövsüm üçün transferlər planlaşdırılır?
- Əlbəttə, yeni futbolçularla maraqlanırıq. Hazırda bu proses də gedir. Konkret ad açıqlamayacam. Çünki mövsüm başlamamış komandanın rəsmi təqdimatını etmək planımız var. Sözsüz, bu tədbirdə yeni transferlər və başqa yeniliklər də açıqlanacaq. Belə deyək, ötənilki heyətdən 5-6 futbolçu qalıb. Təbii ki, çempionatda yalnız onlarla oynamayacağıq.
- Belə görünür ki, "Şamaxı" yenidən formalaşdırılır.
- Bəli, hazırda yeni komanda formalaşdırıldığını söyləmək mümkündü.
ŞAİR ABDULLA