Azərbaycan millisinin Millətlər Liqasında mübarizəsi davam edir.

Yığma bu gün C Liqasının 3-cü qrupunda növbəti oyununu keçirəcək. Rəqib Canni de Byazinin qrupun favoriti adlandırdığı Slovakiyadı. Hər iki “cəbhə”də ab-hava yaxşı deyil. Yığmamız ilk iki qarşılaşmada qələbə qazanmayıb. Slovakiya isə son turda doğma meydanda Qazaxıstana uduzub. “Dalğa Arena”dakı görüş millinin bu turnirdə ilk ev matçı olacaq. Bu amil işə yaraya bilər. Amma azarkeşlərin uğursuzluğa düçar olan komandanın yanında olub-olmayacağı bəlli deyil.

Sözsüz, qarşılaşmanın favoriti Slovakiyadı. Lakin hazırda komandada qarışıqlıq var. Qazaxıstana məğlubiyyətdən sonra baş məşqçi Ştefan Tarkoviç istefaya göndərilib. Artıq komandaya rəhbərlik edəcək şəxslər də bəllidi. Yığmanın “sükanı arxasında” Samuel Slovakla Marek Mintal yer alacaq. Bu barədə yerli federasiyanın mətbuat xidməti məlumat yayıb. Mütəxəssislər qarşıdakı iki görüşdə komandaya rəhbərlik edəcək. Yeni baş məşqçinin adı isə sonra açıqlanacaq. Məhz bu amil işimizə yaraya bilər. Yığmamız başsız rəqibə qarşı görüşdə qələbə qazansa, buna heç də təəccüblənməyəcəyik. Bundan əlavə, Slokaviya ciddi itki ilə üzləşib. Milan Şkrinyar zədə üzündən matçı buraxacaq. Yığmamızda isə yalnız bir itki var. Ötən qarşılaşmada qırmızı vərəqə alan Qismət Alıyev bu görüşdə iştirak etməyəcək. Zədələnərək meydanı tərk edən Maksim Medvedevin durumu isə yaxşıdı.

Komandalar indiyə kimi 8 dəfə üz-üzə gəlib. Bu görüşlərin 7-də Slovakiya qələbə qazanıbsa, 1-də yığmamız 3 xala sevinib. Topların nisbətində də slovaklar öndədi - 19:5.

Millətlər Liqası
C liqası, 3-cü qrup, 3-cü tur
282. AZƏRBAYCAN - Slovakiya 0:1
Vayss, 81.
Hakimlər: DONATAS RUMSAS, Aleksandr Radius, Dovidas Sujidelis, Robertas Valikonis (hamısı Litva).
VAR hakimi: Andris Treymanis (Latviya).
VAR-ın köməkçi hakimi: Daniele Çiffi (İtaliya).
10 iyun. Bakı. “Dalğa Arena”. Saat 20.00