Çoxları bəyənsə də, bəyənməsə də, "tik-tok" həyatımıza daxil olub. Artıq çinlilərin yaratdığı bu sosial platforma həm "feysbuk", həm "vatsap", bəzən də "tvitter" kimi vacib məqamlarda işimizə yarayır.

Düzdü, səviyyəsiz kontentlər çoxdu, amma üzümüzü güldürən paylaşımlar da qarşımıza çıxır. İndi çoxunuza maraqlıdı ki, sosial şəbəkənin nə dəxli "Futbol+" qəzetinə?! Otur, futbolundan, uzağı idmanın hansısa növündən yaz!

Əslində düz deyirsiz. Amma bir məsələ var ki, futbol, idman yazarı da insandı. Cəmiyyətdə baş verən proseslərə o da şərh bildirməlidi. Nəyə görə yazının əvvəllində "tik-tok"dan bəhs etdim? Çünki millinin baş məşqçisi Canni de Byazi özünü bu sosial şəbəkənin fenomeni kimi aparır. Hər dəfə maraqlı nəsə edir ki, diqqəti üzərinə çəksin. Adamın üstündə Allah var! İtaliyalı bunu yaxşı bacarır. Adamın mətbuat konfransları "tik-tok"dakı canlı yayınlara bənzəyir. Yaşlı-başlı adam ağzına gələni danışır. Elə bilir ki, söylədiklərinə görə buna "Şir" atacaqlar.

Ümumiyyətlə, bu "tik-tok"da hədiyyə göndərənləri heç anlamıram. Sonra da deyirlər ki, Azərbaycanda pul yoxdu. Amma camaat adı çəkilən sosial şəbəkədə milyonlar qazanır. Onlardan biri də Tosu Zəngilanski idi. Yazıq yenicə özünə gün ağlayırdı. Öldü, getdi. Mən De Byazini Tosuya bənzədirəm. Zahirən yox, hərəkət və davranışlarından. De Byazi də Tosu kimi hər dəfə bir davranışı ilə gündəm olur. Tosunun məşhur bir sözü var idi: "Genəlmə! Allah haqqı, "lapatka" ilə beynini sivirərəm". Bizim De Byazi də onun kimidi. Hər dəfə nəsə deyir, amma heç bir fayda vermir. Qazaxıstanla oyundan sonra rəqibin bəxtinin gətirdiyini bildirib. Qazax çalışdırıcı da Tosunun "Yandırır eyy, elə yandır" mahnısını qoşaraq "boş-boş danışma, iş gör" deyib.
İtaliyalının Belarusla heç-heçədən sonrakı açıqlaması lap biabırçıdı. Deyib ki, komandam normal futbol oynamağa başlayır. Bu nə boşboğazlıqdı? Bu futbolçuların hamısı peşəkardı, klublarında fərqli turnirlərdə nəticə qazana bilirlər. Millinin uğursuzluğunda günahı özündə görsən, daha yaxşı olardı, cənab De Byazi! Deyəsən, italiyalı düşünür ki, Azərbaycan futbolunda çalışanlar, işləyənlər "tik-tok"da axmaq-axmaq kontent hazırlayanlardı. Ya da onlara pul göndərənlərdi. Gündə bir açıqlama verəcək, rəhbərlik də ona ayın sonunda hədiyyələr göndərəcək.

Qayıdaq yenə "tik-tok"a. Təbii ki, mən də bu sosial şəbəkədən istifadə edirəm. İzlədiyim maraqlı, gülməli şəxslər, kontentlər var. Son vaxtlar məşhur olan, ölkəyə səs salan şəxslər Nia Qurbanova ilə tanınmış rejissor Kənan MM-di. Onların canlı yayınlarını onminlərlə adam izləyir. Gürcüstan azərbaycanlısı Nianı hər dəfə Kənan aldatmağa çalışır. Nəsə söz verir, yerinə yetirmir. Nia da onu "moşennik" adlandırır. İndi De Byazi də Kənan MM kimidi. Millətlər Liqası başlamamış AFFA onun qarşısına şərt qoyub ki, komanda qrupda 1-ci olmalıdı. Buna uyğun da 8 aylıq müqavilə bağlanıb. İndi De Byazi deyir ki, bəs biz ikincilik uğurunda mübarizə aparırıq. Mən Nia olsaydım, Kənana dediyi sözü məmnuniyyətlə De Byaziyə ünvanlayardım. Amma bu bir jurnalist üçün etik deyil. Bu səbəbdən də seçimi sizə buraxıram. Sizcə, italiyalı qocanın dediyinə və etdiklərinə nə ad vermək olar?

İLKİN SULTANLI