“Qrupdan çıxmağı hədəfləmişik” - AÇIQLAMA
Millimiz sabah Millətlər Liqasının C divizionunun 3-cü qrupunda Belarusla üz-üzə gələcək.
Yığma Qazaxıstana qarşı səfərdə keçirdiyi ilk matçda 0:2 hesabı ilə məğlub olaraq azarkeşləri yenə məyus etdi. Sabah baş tutacaq görüş səfər statusu daşısa da, Serbiyada, neytral meydanda baş tutacaq.
Görəsən, komandamız bu qarşılaşmadan qələbə ilə ayrıla bilər? Məsələ ilə bağlı mütəxəssis fikri öyrənməyi lazım bildik. Bunun üçün Sənan Qurbanovla danışdıq.
Təcrübəli mütəxəssisin “Football-plus.az” saytına açıqlaması belə oldu:“Əlbəttə, bizi çətin oyun gözləyir. Çünki Qazaxıstanda ilk matçda məğlub olduq. Buna baxmayaraq, çalışacağıq. Yığmanın bu görüşdə qələbə qazanmağı çox vacibdi. Təəssüf ki, startımız pis alındı. Slovakiya favorit göstərilir. Amma qrupdan çıxmağı hədəfləmişik. Qazaxıstanla matçda istəmədiyimiz nəticə oldu. Nəzərə alaq ki, Belarusla qarşılaşma neytral meydanda oynanılacaq. Üstünlüklərimiz az deyil. Heyətimiz də yaxşıdı. Mənə elə gəlir ki, kənarda qalan futbolçumuz yoxdu. Olsa belə, nəticəyə təsir edəcək qədər deyil. Bir tək ən optimal, ən yaxşı formada olan futbolçuları De Byazi meydana buraxsın. Buna şübhə etmirəm. Sadəcə, bəlkə də beşli yox, dördlü müdafiə sistemi müzakirələrə açıq qala bilər. Çünki biz qələbə qazanmaq üçün mübarizə aparmalıyıq. 3 mərkəz müdafiəçini buraxıb cinahlarda sürətli futbolçulara şans vermək olar. Bu artıq məşqçinin seçimidi. Mənə elə gəlir, həm ağıllı, həm də düzgün futbolla 3 xal qazanmaq lazımdı. Hücumda və müdafiədə diqqətli olmalıyıq. Çünki Belarus da qələbə qazanmaq istəyəcək. Hər halda, biz qalibiyyət gözləyirik millimizdən. Komandaya uğurlar arzulayırıq”.
SƏNƏM FƏRHADOVA
