Fransada keçirilən prezident seçkisində növbəti dəfə qeyri-adi fakt qeydə alınıb.

Seçkinin aprelin 10-da baş tutan birinci turunda Rube kommunasından olan bir seçici Kərim Benzemaya səs vermişdi. “Real”ın hücumçusu Fransa prezidentliyinə namizəd kimi qeydə alınmadığından həmin seçicinin səsi nəzərə alınmamışdı. Hazırkı dövlət başçısı Emmanuel Makron və ultrasağçı Milli Birlik Partiyasının lideri Marin le Pen ikinci tura vəsiqə qazanmışdılar.

Seçkinin aprelin 24-ə təyin olunan ikinci turunda da oxşar hala təsadüf olunub. Təxminən 400 nəfər əhalisi olan Talnye kommunasında Kilian Mbappeyə 10 səs verilib! Bülletenlərin keyfiyyətli tərtib olunması diqqətdən yayınmayıb. Bu isə aksiyanın planlı şəkildə təşkil edildiyini göstərir. Amma Fransa yığması ilə DÇ-2018-in qalibi olan Mbappe seçkidə namizəd kimi iştirak etmədiyi üçün ona verilən səslər nəzərə alınmayıb.

Qeyd edək ki, seçkilərin 2-ci turunda qalib gələn Makron ardıcıl ikinci dəfə Fransa prezidenti seçilib.