Prezident seçkisində bir seçici ona səs verib!

Bu mövsüm əla oyunu ilə seçilən Kərim Benzemanın xüsusilə son aylarda uğurlu çıxışının səbəbi məlum olub.

Fransalı hücumçu cari mövsümdə meydana çıxdığı 38 matçda 38 qol vurub, 13 məhsuldar ötürmə edib. O, Çempionlar Liqasının “Çelsi” ilə 1/4 final matçlarında (3:1, 2:3) ümumilikdə 4 qol vuraraq “Real”ın yarımfinala çıxmasında böyük rol oynayıb. Kərimin mövsümün həlledici mərhələsində əla formada olmasına “La Gazzetta dello Sport” aydınlıq gətirib. İtaliyanın ən populyar idman nəşrinin yazdığına görə, bunun səbəbi yalnız Karlo Ançelottinin rəhbərliyi altında oynaması ilə bağlı deyil. 34 yaşlı oyunçunun soy aylarda tətbiq etdiyi pəhriz ona çox kömək olub. Mikrobioloji qidalanma üzrə mütəxəssisdən məsləhət alan Benzema daha çox balıq və tərəvəz yeməyə başlayıb. O, həmçinin kokos yağı və ədviyyatlardan istifadəni artırıb. Bunlar isə karbohidratların və şəkərin istehlakını azaldır.

Benzemanın əla formada olmaq üçün etdikləri bununla bitmir. Futbolçu evdəki məşq proqramını da dəyişib. O, son vaxtlar evdə daha çox məşq edir, yağ kütləsini azaltmaq və əzələ kütləsini artırmaq üçün çox çalışır. Kərim artıq evdə məşğul olduğu idmanı hobbi yox, məşqin vacib hissəsi kimi görür. Sıx matç qrafiki və yaşının artması səbəbindən yaxşı yuxuya, istirahətə və fizioterapiyaya ehtiyacı olan Benzema hicama terapiyaya çox müraciət edir və bunu ən yaxşı üsullardan biri kimi görür.

Onunla bağlı yayılan bu xəbər də maraqlıdı. Fransada keçirilən prezident seçkisində bir seçici “Real”ın hücumçusuna səs verib. “Footmercato” portalının yaydığı məlumatda bildirilib ki, Benzema Fransa prezidentliyinə namizəd kimi qeydə alınmadığından seçicinin səsi nəzərə alınmayıb. Prezident seçkisinin birinci turu aprelin 10-da keçirilib. Hazırkı dövlət başçısı Emmanuel Makron və ultrasağçı Milli Birlik Partiyasının lideri Marin Le Pen ikinci tura vəsiqə qazanıblar. Seçkinin ikinci turu aprelin 24-nə təyin olunub.