De Liqt: ''Ronaldoya həddən artıq hörmət edirdim''
''Yuventus''un 2019-cu ilin yayında ''Ayaks''dan 75 milyon avroya transfer etdiyi Mattiys de Liqt İtaliya mətbuatına açıqlamalar verib.
''Yuve''də 3-cü mövsümünü keçirən 22 yaşlı niderlandlı mərkəz müdafiəçisi sabiq komanda yoldaşı Kriştiano Ronaldo, eləcə də A seriyasındakı oyunların səviyyəsindən danışıb: ''İlk günlər mənim üçün çətin keçdi. Çünki ətrafımdakılara hörmətlə yanaşmağa alışmışam. Bəlkə də Kriştiano Ronaldo və Buffon da daxil olmaqla komanda yoldaşlarıma həddən artıq hörmətlə yanaşırdım. Amma biz hamımız eyni komandanın bir parçasıyıq. Bunu anlamaq lazımdı. Ondan sonra isə yaxşı komanda yoldaşı və yaxşı dosta çevrilirsən. İtaliyada bütün oyunlar çətinkeçir və açığı bu məqam məni yaxşı mənada təəccübləndirdi. Biz ''Ayaks''da adətən 15-ci pillədən aşağıda olan rəqiblərlə oyunda hətta 2:0 hesabı ilə qalib gələndə də sevinmirdik. Çünki az qol vurduğumuzu düşünürdük. ''Yuventus''dakı ilk mövsümümdə son pillədəki rəqibi 1:0 yendikdən sonra belə komanda yoldaşlarımın sevindiyini gördüm. Öz-özümə düşünürdüm ki, qalib gəlsək də, daha çox qol vurmalı idik. Amma ətrafımda hər kəs bu nəticədən razı görünürdü. İtaliyada hətta aşağı səviyyəli komandaların da mübarizə əzmi yüksəkdi''.
Digər xəbərlər
