Tanınmış futbolçunun ölüm səbəbi bəlli oldu
Faciəvi şəkildə dünyasını dəyişən Aaron Bupendza ilə bağlı yeni xəbər var.
Xatırladaq ki, dünən 28 yaşlı qabonlu forvarddan şok xəbər gəldi. Onun Çində yaşadığı binanın 11-ci mərtəbəsindən düşərək öldüyü məlum oldu. İddia edilmişdi ki, bu hadisədən bir müddət öncə futbolçunun evinə onun qardaşı gəlmiş və onlar arasında münaqişə yaşanmışdı. Ona görə də Bupendzanın intihar etdiyi, başqası tərəfindən öldürüldüyü, yoxsa sadəcə ehtiyatsızlıq üzündən dünyasını dəyişdiyini dəqiqləşdirmək üçün Çin polisi dərhal araşdırmaya başlamışdı. Amma maraqlıdı ki, araşdırma heç 24 saat ötmədən başa çatdırılıb.
Çin polisinin yaydığı rəsmi məlumatdan belə aydın olur ki, tanınmış futbolçu intihar etməyib və öldürülməyib. O ehtiyatsızlıq üzündən 11-ci mərtəbədən yıxılaraq dünyasını dəyişib. Hanqju bölgə polisinin rəsmi açıqlamasında bunlar qeyd olunub:
''Aprelin 16-da saat 13.14-də bizə bir yaşayış məntəqəsində bir nəfərin binadan yıxılması ilə bağlı məlumat daxil oldu. Həmin əraziyə dərhal əməkdaşlarımız göndərildi və yaralı mümkün olan ən qısa müddətdə xəstəxanaya çatdırıldı. Ancaq tibbi yardıma baxmayaraq həmin şəxs dünyasını dəyişdi. Bu şəxsin Qabon Cümhuriyyəti vətəndaşı, eyni zamanda ''Çjetsyan'' klubunun 28 yaşlı peşəkar futbolçusu Aaron Bupendza olduğu təsdiq edilmişdi. Yerində apardığımız incələmələr və sonrakı araşdırmalar onu göstərir ki, Bupendza ehtiyatsızlıq üzündən evin eyvanından yıxılaraq dünyasını dəyişib. Bu üzdən araşdırmanın başa çatdırılmasına qərar vermişik''.
Xatırladaq ki, bu futbolçu 2020/21 mövsümündə ''Hatayspor''un heyətində 22 qolla Türkiyə çempionatının bombardiri olmaqla diqqət çəkmişdi. Bupendza karyerası boyu Türkiyə, Fransa, Qətər, Portuqaliya, ABŞ, Rumıniya və Çində forma geymişdi.
Digər xəbərlər
