Jorj Kaşkilyanın “İmişli”nin baş məşqçi postuna təyinatı nə qədər gözlənilməz olmuşdusa, gedişi də bir o qədər sürpriz oldu. Bəli, portuqaliyalı ilə yolların ayrılacağı haqda iddialar hələ ötən ay yayılmışdı. Ancaq bunun hansısa məntiqə sığmaması xəbərlərin həqiqətəuyğun olmadığı haqda fikir formalaşdırmışdı. Xatırlayırsızsa, Aran təmsilçisi premyer-liqada debütant olmasına rəğmən, əcnəbi mütəxəssisə güvəndiyi üçün “topa tutulmuşdu”. Komandanın ev oyunlarını İmişlidə keçirməyəcəyi də dəqiq olduğundan, “pələnglər”i heç cür peşəkar klub kimi qəbul etməyənlərin sayı həddən artıq çox idi. Ancaq Kaşkilya mövsüm ərzində qazandığı nəticələrlə kollektiv üzərində yaranan təzyiqi azaltmağa müvəffəq oldu. Hətta iş o həddə çatdı ki, Aran təmsilçisi fərqli oyun tərziylə seçilməyə başladı, iddialı komandaların belə qorxulu yuxusuna çevrildi. Ən əsası, “İmişli” mövsüm ərzində premyer-liqanı tərk etmək qorxusuyla, demək olar, üzləşmədi. Yalnız son turlarda cüzi narahatlıq var idi ki, kollektiv əsas rəqiblərlə sınaqdan üzüağ çıxmaqla təhlükəsiz zonada yer aldı.

İddialara görə, ayrılığın səbəbi Kaşkilyanın məvacibinin artırılmasını tələb etməsidi. Səbəb gerçəkdən budusa, heç şübhəsiz, portuqaliyalı bunu haqq edir. Öz aramızdı, təkcə baş məşqçi kimi fəaliyyətinə görə yox, həm də “İmişli”nin Portuqaliyada reklamına görə. Yox-yox, zarafat etmirəm, mütəxəssisin Aran təmsilçisindəki fəaliyyətiylə bağlı bir neçə xəbəri öz gözlərimlə məşhur “A Bola” nəşrində görmüşəm. O başqa məsələ ki, baş məşqçinin yeni formalaşdırılan, sərgərdan həyatı yaşayan, məhdud büdcəli komandayla mövsümü 9-cu pillədə bitirməsi yetərincə təqdirəlayiq idman hadisəsidi...

Öz aramızdı, Kaşkilyanı tezliklə, bəlkə elə bu gün "Sumqayıt”ın baş məşqçi postunda görsəm, təəccüblənməyəcəm. Axı həqiqətən də Saşa İliçlə yolları ayıran “kimyaçılar”ın uzun müddətdi yeni mütəxəssis axtarışında olmasını və hansısa səbəbdən hələ də təyinatın reallaşmamasını başqa cür izah etmək çətindi. İndi “Sumqayıt” avrokuboklar uğrunda mübarizə aparsın, “İmişli” də baxsın! Ya bəlkə Aran təmsilçisinin də məqsədi daha təcrübəli mütəxəssis tapıb ilk “dördlük” uğrunda oynamaqdı? Düzü, klub rəhbərliyinin məlum şərtlər altında belə eyforiyaya qapılacağını düşünmürəm. Klubun imkanları öz yerində. Ancaq “Sabah”, “Qarabağ”, “Neftçi”, “Turan Tovuz”, “Zirə” və “Sumqayıt”ın olduğu çempionatda 4-cü pillə belə mümkünsüz görünür. Necə deyərlər, ağıl var, məntiq var. Belədə Kaşkilyanın göndərilməsi nə dərəcədə doğru addımdı? Hələ ədalət prinsipini demirik. Düzdü, bu gün komandaları 1-ci liqadan premyer-liqaya gətirən mütəxəssislər dərhal yola salındığından belə hallara alışmışıq. Klublar müxtəlif əsaslarla özlərinə haqq qazandırmağa çalışır. Etiraf edim ki, bəzi hallarda həmin qərarları doğru saymaq mümkündü. Ancaq “İmişli” Kaşkilyaya münasibətdə elə ədalətsizliyə yol verdi ki, bir də çətin haqdan danışa bilsin!

KƏNAN BAHADIR