Deyəsən, Joze Mourinyo yeni mövsümdən İspaniyada işləyəcək. Onun yenidən “Real”ı çalışdırmaq şansı var.

"Football-plus.az" xəbər verir ki, baş məşqçi vəzifəsinə sanballı namizəd axtaran Madrid klubunun prezidenti Florentino Peresin Mourinyo ilə videokonfrans şəklində danışıq apardığı məlum olub.

“Mundo Deportivo” qəzetinin xəbərinə görə, danışıq təxminən bir saat çəkib. İspaniya nəşri “Benfika”nın baş məşqçisinin Madridə qayıtmağın əleyhinə olmadığını və bir sıra şərtlər irəli sürdüyünü yazıb. 63 yaşlı mütəxəssis Madrid klubunun rəhbərliyinə nə az, nə çox -10 tələb təqdim edib. Əsas şərtlər sırasına ikiillik müqavilə, heyət üzərində tam nəzarət və bir neçə futbolçu ilə yolların ayrılması daxildi.

Onun ilkin olaraq David Alaba, Dani Karvaxal və Fran Qonsalesin xidmətindən maraqlı olmadığı iddia edilir. Mourinyo həmçinin məşqçi heyətini özü ilə gətirmək istəyir, lakin komandanın hazırkı çalışdırıcısı Alvaro Arbeloanın klubda qalmasına qarşı deyil.

Bununla yanaşı, fiziki hazırlıq üzrə məşqçi Antonio Pintusun komandadan uzaqlaşdırılmasını tələb edir. Portuqaliyalı mütəxəssis əlavə olaraq yay hazırlığının ABŞ və Asiyada keçirilməməsini, prezident Pereslə daimi birbaşa əlaqəsinin olmasını və futbolçuların zədələri ilə bağlı ikinci tibbi rəyin alınmasını istəyir. Peresin onun bu şərtlərini bir neçə gün dəyərləndirəcəyi və Mourinyoya gələn həftə cavab verəcəyi də bildirilib.

Xatırladaq ki, portuqaliyalı məşqçi “Real”ı 2010-13-cü illərdə çalışdırıb. Komanda bu müddətdə La Liqa çempionluğu, İspaniya kuboku və İspaniya Superkubokunu qazanıb.