Joze Mourinyo ilə bağlı maraqlı xəbər yayılıb. Bir neçə həftə əvvəl “Roma”dan istefaya göndərilən mütəxəssisin Avropada qalmaqda qərarlı olduğu qeyd edilir.

Onun xidmətində Asiyanın bir sıra klubları maraqlı idi. Lakin portuqaliyalı məşqçi karyerasını “Köhnə qitə”də, özü də superklublardan birində davam etdirmək niyyətindədi. “Bild” qəzeti don Jozenin alman dilini öyrənməyə başladığını xəbər verib. Bu mənbə onun növbəti mövsümdən “Bavariya”nın başında ola biləcəyini yazıb. Münhenlilərin hazırkı çalışdırıcısı Tomas Tuxelin yayda postu ilə vidalaşmaq ehtimalı daha da artıb.

Görünür, Mourinyo Portuqaliya, İngiltərə, İspaniya və İtaliyadan sonra Almaniyada da gücünü sınamaq istəyir.