''Fənərbaxça''ya böyük pullar qarşılığında gələn, eləcə də illik maaşı 11 milyon avro olan, amma ona bəslənilən ümidlərin heç yarısını da doğrultmayan və son matçlardakı inamsız performansı ilə tamamilə gözdən düşən qapıçı Edersonun gələcək taleyi böyük maraq doğurur.

"Football-plus.az" xəbər verir ki, indi camiənin əsas diqqəti 1 aydan sonra baş tutacaq seçkilərə yönəlib. Amma kimin prezident seçilməsindən asılı olmayaraq braziliyalı əlcək sahibi ilə yollar ayrılacaq.

Edersonun meneceri Xorxe Mendeş Səudiyyə Ərəbistanı nəhəngləri ilə danışıqlar aparır. Edersona ''Əl-Hilal'' və ''Əl-Nəssr''in marağı var. Amma qapıçının illik maaşı ərəbləri çəkindirir. Onlar Edersona Türkiyədə qazandığı qədər illik maaş ödəmək istəmirlər. Bu üzdən danışıqların irəliləməsi üçün ilk növbədə Ederson maaşının azaldılmasına razılıq verməlidi. Onun hər halda seçkilərə qədər düşünmək üçün zamanı olacaq. Seçkilərdən sonra Mendeş masanın üzərindəki təklifləri və şərtləri yeni rəhbərliyə çatdıracaq.

İddialara inansaq, 31 yaşlı qapıçının müqaviləsində sərbəstqalma maddəsi var. Amma bunun gah 25 milyon avro, gah 20 milyon avro, gah da 15 milyon avro olduğu bildirilir.

Qeyd edək ki, Ederson derbidə qırmızı vərəqə alması və hakimi təhqir etməsi üzündən 3 oyunluq cəza alıb. Yəni o, artıq bu mövsüm bir daha meydana çıxmayacaq. Edersonun vətənə qayıtması ehtimalı da var. Onun bu mövsüm Türkiyə çempionatında forma geydiyi 24 qarşılaşmada 24 qol buraxdığını və bunların 8-də qapısını toxunulmaz saxladığını bildirək.