Məlum olduğu kimi dünən Arda Gülərin zədə üzündən mövsümü başa vurması haqda xəbərlər gəldi.

"Football-plus.az" xəbər verir ki, əvvəlcə ''Real'' türkiyəli ulduzun əzələ zədəsi ilə bağlı rəsmi məlumat verdi. Sonra isə Fabritsio Romano Ardanın bu mövsüm bir daha meydana çıxa bilməyəcəyini açıqladı.

Türkiyə mətbuatının yazdığına inansaq, Türkiyə yığmasının baş məşqçisi Vinçentso Montella bu xəbərin ardından dərhal Ardaya zəng vurub. İtaliyalı mütəxəssis aparıcı futbolçusunun durumu ilə yaxından maraqlanıb və ona təsəlli verib. Təbii ki, türkiyəli futbolsevərləri indi maraqlandıran əsas məsələ 21 yaşlı futbolçunun dünya çempionatına qədər sağalıb-sağalmayacağıdı.

İddialara inansaq, Türkiyə yığmasının tibbi personalı ''Real''ın həkimlərinə zəng vuraraq onlardan Ardanın dizinin analizinin cavablarını tələb ediblər. Yığmanın həkimləri futbolçunun durumunu incələdikdən sonra onun mundialda iştirak edə biləcəyi qənaətinə gəliblər. Amma böyük ehtimalla Arda ''ay-ulduzlular''ın DÇ ərəfəsində keçirəcəyi hər iki yoxlama oyununu buraxmalı olacaq. Montellanın onun səhhəti ilə bağlı riskə gedəcəyi gözlənilmir.

Qeyd edək ki, Arda indiyə qədər yığmanın heyətində iştirak etdiyi 28 qarşılaşmada aktivinə 6 qol, 7 məhsuldar ötürmə yazıb.